ദേശീയപാത വികസനത്തിന് കേന്ദ്രം സഹായിച്ചില്ലെന്ന് മുഖ്യമന്ത്രി
സമ്മിറ്റിന് ആളു കുറഞ്ഞതിന് സംഘാടകരെ വിമര്ശിച്ച് മുഖ്യമന്ത്രി
പാലക്കാട്: ദേശീയപാത വികസനത്തിന് കേന്ദ്രം സഹായിച്ചില്ലെന്ന് മുഖ്യമന്ത്രി. മറ്റു സംസ്ഥാനങ്ങള്ക്ക് പണം നല്കിയെന്നും കേരളത്തിന് സ്ഥലം ഏറ്റെടുക്കാന് പണം തന്നില്ലെന്നും മുഖ്യമന്ത്രി പറഞ്ഞു. കഞ്ചിക്കോട് ഇന്ഡസ്ട്രീസ് വ്യാവസായിക സമ്മിറ്റിലാണ് മുഖ്യമന്ത്രിയുടെ പരാമര്ശം.
'എനിക്കു ചിലത് പറയാന് തോന്നുന്നുണ്ട്. പക്ഷേ പറയാതിരിക്കുകയാണ് ഞാന്. അത്രയും വിപുലമായ ഒരു പരിപാടിയുടെ ഗൗരവം ഉള്ക്കൊള്ളാന് കഴിഞ്ഞോയെന്ന സംശയമാണ് എനിക്കുള്ളത്' സമ്മിറ്റിന് ആളു കുറഞ്ഞതിന് സംഘാടകരെ വിമര്ശിച്ച് മുഖ്യമന്ത്രി പറഞ്ഞു. പാലക്കാട് പുതുശേരിയില് വ്യവസായ വകുപ്പുമായി സഹകരിച്ച് കഞ്ചിക്കോട് ഇന്ഡസ്ട്രിയല് ഫോറം നടത്തുന്ന സമ്മിറ്റിനിടെയാണ് മുഖ്യമന്ത്രിയുടെ വിമര്ശനം.
മാധ്യമങ്ങള്ക്കു നേരെയും രൂക്ഷമായ വിമര്ശനമാണ് മുഖ്യമന്ത്രി ഉന്നയിച്ചത്. ചില മാധ്യമങ്ങള് നാടിന്റെ വികസനം അറിയിക്കാതിരിക്കാന് ശ്രമിക്കുകയാണ്. അറിയിക്കേണ്ട മാധ്യമങ്ങള് അറിയിക്കേണ്ടെന്ന് വിചാരിക്കുന്നു. അറിയേണ്ടവര് ഇക്കാര്യം അറിയാതെ പോകുന്നുവെന്നും, സര്ക്കാര് ചെയ്യുന്ന നല്ല കാര്യങ്ങള് ഇകഴ്ത്താനുള്ള ശ്രമം നടക്കുകയാണെന്നും മുഖ്യമന്ത്രി പറഞ്ഞു.
ഏതു സര്ക്കാര് ഭരിച്ചാലും ഇതെല്ലാം നടക്കുമെന്ന് ചിലര് പറയുന്നു. ഏതു സര്ക്കാര് ഭരിച്ചാലും ഇതൊന്നും നടക്കില്ല. അസാധ്യമെന്ന് വിചാരിച്ച പലതും ഈ സര്ക്കാര് നടപ്പിലാക്കിയെന്നും മുഖ്യമന്ത്രി പറഞ്ഞു.