കൊറോണ ഭീതി: താജ്മഹല് ഉള്പ്പടെ എല്ലാ ചരിത്ര സ്മാരകങ്ങളും അടച്ചിടും
എല്ലാ വിദ്യാഭ്യാസ സ്ഥാപനങ്ങളും (സ്കൂളുകള്, സര്വകലാശാലകള്), ജിമ്മുകള്, മ്യൂസിയങ്ങള്, സാംസ്കാരിക, സാമൂഹിക കേന്ദ്രങ്ങള്, സ്വിമ്മിങ് പൂളുകള് , തിയേറ്ററുകള് എന്നിവ അടച്ചുപൂട്ടാന് സര്ക്കാര് നേരത്തെ നിര്ദ്ദേശിച്ചു. വിദ്യാര്ഥികള്ക്ക് വീട്ടില് തന്നെ തുടരാനും നിര്ദ്ദേശം നല്കിയിട്ടുണ്ട്.
ന്യൂഡല്ഹി: കൊറോണ വൈറസ് പടര്ന്നുപിടിക്കുന്ന സാഹചര്യത്തില് താജ്മഹല് ഉള്പ്പെടെ രാജ്യത്തൊട്ടാകെയുള്ള എല്ലാ സംരക്ഷിത സ്മാരകങ്ങളും കേന്ദ്ര മ്യൂസിയങ്ങളും അടച്ചിടും.മാര്ച്ച് 31വരെയാണ് അടച്ചിടുകയെന്ന് കേന്ദ്ര സാംസ്കാരിക മന്ത്രി പ്രഹ്ലാദ് പട്ടേല് അറിയിച്ചു.
കൊറോണ സംബന്ധിച്ച മന്ത്രിമാരുടെ ഉന്നതതല യോഗം തിങ്കളാഴ്ച നടന്നതിന് ശേഷമാണ് ഏറ്റവും പുതിയ ഉത്തരവ് പുറത്തിറക്കിയിരിക്കുന്നത്. ഒരു പ്രതിരോധ തന്ത്രമെന്ന നിലയില് സാമൂഹിക അകലം പാലിക്കുന്നതിനുള്ള ഒരു കൂട്ടം നടപടികള് നടപ്പാക്കണമെന്ന് യോഗത്തില് തീരുമാനിച്ചു.മാര്ച്ച് അവസാനം വരെ താജ്മഹല് അടച്ചിടാന് ഉത്തരവിടണമെന്നാണ് ആഗ്രയുടെ മേയര് നവീന് ജയിന് കേന്ദ്ര സര്ക്കാരിനോട് ആവശ്യപ്പെട്ടത്. സ്മാരകങ്ങളിലും മ്യൂസിയങ്ങളിലും നിരവധി ആളുകള് വന്ന് പോകുന്നതിനാല് രോഗം പടര്ന്നുപിടിക്കാന് സാഹചര്യം കൂടുതലാണ്, അതുകൊണ്ട് അവ അടച്ചുപൂട്ടേണ്ടത് അനിവാര്യമാണെന്നും സാംസ്കാരിക മന്ത്രാലയം അധികൃതര് പറഞ്ഞു
അതേസമയം എല്ലാ വിദ്യാഭ്യാസ സ്ഥാപനങ്ങളും (സ്കൂളുകള്, സര്വകലാശാലകള്), ജിമ്മുകള്, മ്യൂസിയങ്ങള്, സാംസ്കാരിക, സാമൂഹിക കേന്ദ്രങ്ങള്, സ്വിമ്മിങ് പൂളുകള് , തിയേറ്ററുകള് എന്നിവ അടച്ചുപൂട്ടാന് സര്ക്കാര് നേരത്തെ നിര്ദ്ദേശിച്ചു. വിദ്യാര്ഥികള്ക്ക് വീട്ടില് തന്നെ തുടരാനും നിര്ദ്ദേശം നല്കിയിട്ടുണ്ട്.