യുവാവിനെ ഹണിട്രാപ്പില്‍ കുടുക്കാന്‍ ശ്രമിച്ച നാലുപേര്‍ പിടിയില്‍

ചക്കരക്കല്ല്(കണ്ണൂര്‍): യുവാവിനെ ഹണി ട്രാപ്പില്‍പ്പെടുത്തി പണം തട്ടാന്‍ ശ്രമിച്ച നാലുപേര്‍ അറസ്റ്റില്‍. കാഞ്ഞങ്ങാട് സ്വദേശികളായ പതിനേഴുകാരി, മൈമൂന (51), ഇബ്രാഹിം സജ്മല്‍ അര്‍ഷാദ് (28), എ കെ അബ്ദുല്‍ കലാം (52) എന്നിവരെയാണ് ചക്കരക്കല്ല് പോലിസ് അറസ്റ്റ് ചെയ്തത്. മൊബൈല്‍ഫോണ്‍ ആപ്പിലൂടെ പരിചയപ്പെട്ട കോയ്യോട് സ്വദേശിയായ യുവാവിനെയാണ് കെണിയില്‍പ്പെടുത്താന്‍ ശ്രമിച്ചത്. സ്ത്രീ സൗഹൃദം നടിച്ച് പരാതിക്കാരനുമായി അടുത്തു. കഴിഞ്ഞദിവസം പരാതിക്കാരനോട് കാഞ്ഞങ്ങാട്ടേക്ക് വരാന്‍ പറഞ്ഞു. ഇപ്രകാരം സ്ത്രീ പറഞ്ഞ സ്ഥലത്തെത്തിയ യുവാവിനെ ഒരു വീട്ടിലേക്ക് കൊണ്ടുപോയി. ശേഷം മറ്റു കൂട്ടാളികളെ വിളിച്ചുവരുത്തി ഭീഷണിപ്പെടുത്തി. പല രീതിയിലും ഇയാളുടെ ഫോട്ടോയെടുപ്പിച്ചു. തുടര്‍ന്ന് ഇയാളോട് 10 ലക്ഷം രൂപ ആവശ്യപ്പെടുകയും ചെയ്തു. കൈയില്‍ പണമില്ലെന്നും നാട്ടില്‍ എത്തിയാല്‍ തരാമെന്ന് പറഞ്ഞ് ഇയാള്‍ സംഘത്തെ ചക്കരക്കല്ലില്‍ എത്തിച്ചു. തുടര്‍ന്ന് പോലിസില്‍ വിവരമറിയിക്കുകയായിരുന്നു. പണത്തിനായി കാത്തിരുന്ന സംഘത്തെ പോലിസാണ് പിടികൂടിയത്.