യുപിയില്‍ വിവാഹാഘോഷത്തിലെ വെടിവെപ്പ്: എട്ട് വയസുകാരന്‍ ഗുരുതരാവസ്ഥയില്‍ (വീഡിയോ)

മീററ്റ്: ഉത്തര്‍പ്രദേശിലെ ബുലന്ദഷഹറില്‍ നടന്ന വിവാഹാഘോഷത്തിനിടെ ഉണ്ടായ ആഘോഷ വെടിവെപ്പില്‍ എട്ട് വയസുകാരന്‍ ഗുരുതരമായി പരിക്കേറ്റു. സറാഫ് ബസാര്‍ പ്രദേശത്ത് വ്യാഴാഴ്ച രാത്രിയാണ് സംഭവം. 14 വയസ്സുകാരന്റെ കയ്യിലിരുന്ന തോക്ക് പൊട്ടുന്നതിന്റെ സിസിടിവി ദൃശ്യം സാമൂഹിക മാധ്യമങ്ങളില്‍ പ്രചരിക്കുന്നുണ്ട്.

പോലിസിന്റെ പ്രാഥമിക അന്വേഷണത്തില്‍, വിവാഹാഘോഷത്തില്‍ വരന്റെ കൂടെ ഉണ്ടായിരുന്ന 14 വയസുകാരനാണ് വെടിയുതിര്‍ത്തെന്ന് കണ്ടെത്തി. വെടിയേറ്റ് തലയില്‍ ഗുരുതരമായി പരിക്കേറ്റ രേഹാന്‍ഷ് (8)നെ ഉടന്‍ നഗരാശുപത്രിയില്‍ പ്രവേശിപ്പിച്ചെങ്കിലും പിന്നീട് വിദഗ്ധ ചികിത്സയ്ക്കായി ചീശറമയിലെ മെഡിക്കല്‍ കോളജിലേക്ക് മാറ്റി. കുട്ടിയുടെ നില അതീവ ഗുരുതരമാണെന്നും ശസ്ത്രക്രിയ നടത്തിയതായും അധികൃതര്‍ അറിയിച്ചു.

'പരാതി ലഭിക്കുന്നതോടെ എഫ്‌ഐആര്‍ രജിസ്റ്റര്‍ ചെയ്യും. ആയുധ ലൈസന്‍സ് റദ്ദാക്കുന്നതിനുള്ള നടപടികളും ആരംഭിക്കും'. എന്ന് ബുലന്ദ്ശഹര്‍ സിറ്റി സര്‍ക്കിള്‍ ഓഫീസര്‍ പ്രകര്‍ പാണ്ഡേ അറിയിച്ചു.

സാക്ഷികളുടെ മൊഴിപ്രകാരം, ആഘോഷത്തിനിടെ ആളുകള്‍ നൃത്തം ചെയ്യുന്നതിനിടെയാണ് വെടിയൊച്ച കേട്ടത്. ആദ്യം അത് ആഘോഷത്തിന്റെ ഭാഗമെന്ന് കരുതിയെങ്കിലും പിന്നീട് ഒരു കുട്ടിക്ക് വെടിയേറ്റതായി മനസിലായതോടെ സ്ഥലത്ത് കലാപാവസ്ഥയുണ്ടായി. സംഭവത്തെ തുടര്‍ന്ന് വിവാഹച്ചടങ്ങ് നിര്‍ത്തിവച്ചതായും ചില കുടുംബാംഗങ്ങള്‍ ഒളിവില്‍ പോയതായും പ്രദേശവാസികള്‍ അറിയിച്ചു.