ഫിഫ അണ്ടര്‍ 17 ലോകകപ്പ്; ബ്രസീല്‍ പുറത്ത്, പോര്‍ച്ചുഗല്‍-ഓസ്ട്രിയ ഫൈനല്‍

ആസ്പയര്‍ സോണ്‍: ഫിഫ അണ്ടര്‍ 17 ഫുട്‌ബോള്‍ ലോകകപ്പില്‍ നിന്ന് ബ്രസീല്‍ പുറത്ത്. രണ്ടാം സെമി പോരാട്ടത്തില്‍ പെനാല്‍റ്റി ഷൂട്ടൗട്ടില്‍ ബ്രസീലിനെതിരേ 6-5ന് ജയിച്ചാണ് പോര്‍ച്ചുഗല്‍ കലാശപ്പോരിലേക്കെത്തുന്നത്. നിശ്ചിത സമയത്ത് ഇരുടീമുകള്‍ക്കും ഗോള്‍ നേടാനാകാതെ വന്നതോടെ മല്‍സരം പെനാല്‍റ്റി ഷൂട്ടൗട്ടിലേക്ക് നീങ്ങുകയായിരുന്നു. ആദ്യ അഞ്ചു ഷോട്ടുകളും ഇരു ടീമുകളും ലക്ഷ്യത്തിലെത്തിച്ചതോടെ മല്‍സരം സഡന്‍ ഡെത്തിലേക്കു നീങ്ങുകയായിരുന്നു.

ഗ്രൂപ്പ് ബിയില്‍ രണ്ടാം സ്ഥാനത്തേക്കെത്തിയ പോര്‍ച്ചുഗല്‍ മൂന്നു മല്‍സരങ്ങളില്‍ രണ്ടിലും വിജയിച്ചു. ക്വാര്‍ട്ടര്‍ ഫൈനലില്‍ സ്വിറ്റ്സര്‍ലന്‍ഡിനെയാണ് തോല്‍പ്പിച്ചത്. മൂന്നു മല്‍സരങ്ങളില്‍ രണ്ടു വിജയവും ഒരു സമനിലയും നേടിയ ബ്രസീല്‍ ഗ്രൂപ്പ് എയില്‍ ഒന്നാമതെത്തിയിരുന്നു. ക്വാര്‍ട്ടര്‍ ഫൈനലില്‍ മൊറോക്കോയെ തോല്‍പ്പിച്ചാണ് സെമിഫൈനലിലേക്ക് യോഗ്യത നേടിയത്. നേരത്തെ ഇറ്റലിയെ മറുപടിയില്ലാത്ത രണ്ടു ഗോളിന് തോല്‍പ്പിച്ചാണ് ഓസ്ട്രിയ ഫൈനലില്‍ പ്രവേശിച്ചത്. ഓസ്ട്രിയ മൂന്നു മല്‍സരങ്ങളും വിജയിച്ചാണ് ഫൈനല്‍ വരെ എത്തിയിരിക്കുന്നത്. മൂന്നാം സ്ഥാനക്കാര്‍ക്കായുള്ള മല്‍സരവും ഫൈനല്‍ മല്‍സരവും വ്യഴാഴ്ച നടക്കും.