ബസ് കാത്തുനില്‍ക്കുമ്പോള്‍ ഇഷ്ടിക തലയില്‍ വീണ യുവതി മരിച്ചു

കൊച്ചി: ബസ് കാത്തുനില്‍ക്കുമ്പോള്‍ ഇഷ്ടിക തലയില്‍ വീണ് പരിക്കേറ്റ് ചികില്‍സയിലായിരുന്ന യുവതി മരിച്ചു. വടക്കേക്കര സത്താര്‍ ഐലന്‍ഡ് കൈതത്തറ ശ്യാമോന്റെ ഭാര്യ ആര്യ (34)യാണ് മരിച്ചത്. കഴിഞ്ഞ ദിവസം വൈകിട്ട് മുനമ്പം മാണി ബസാറില്‍ മകള്‍ ശിവാത്മിക (6) യോടൊപ്പം ബസ് കാത്തുനില്‍ക്കുമ്പോഴാണ് സമീപത്ത് നിര്‍മാണം നടക്കുന്ന മൂന്നു നില കെട്ടിടത്തിന്റെ മുകളില്‍നിന്നു സിമന്റ് ഇഷ്ടിക തലയില്‍ വീണത്.

ഗുരുതരാവസ്ഥയിലായ ആര്യയ്ക്ക് കൊച്ചിയിലെ സ്വകാര്യ ആശുപത്രിയില്‍ അടിയന്തര ശസ്ത്രക്രിയ നടത്തിയെങ്കിലും രക്ഷിക്കാനായില്ല. നിസ്സാര പരുക്കേറ്റ മകള്‍ക്ക് കുഴുപ്പിള്ളിയിലെ സ്വകാര്യ ആശുപത്രിയില്‍ പ്രാഥമിക ചികിത്സ നല്‍കി.