മാര്‍ബിളുമായെത്തിയ ലോറി വയലിലേക്ക് മറിഞ്ഞു; അതിഥി തൊഴിലാളി മരിച്ചു

കോഴിക്കോട്: മാര്‍ബിളുമായെത്തിയ ലോറി വയലിലേക്ക് മറിഞ്ഞ് അതിഥി തൊഴിലാളി മരിച്ചു. ബിഹാര്‍ സ്വദേശി രാംനാഥ് റാമാണ് മരിച്ചത്. കൊടുവള്ളി-എന്‍ഐടി റോഡില്‍ കുണ്ടുങ്ങലില്‍ തിങ്കളാഴ്ച രാത്രി 12 മണിയോടെയാണ് അപകടം. കണ്ണൂരില്‍നിന്ന് മാര്‍ബിളുമായി വന്ന ലോറിയാണ് അപകടത്തില്‍പ്പെട്ടത്.

മാര്‍ബിള്‍ ഇറക്കാനായി ലോറിയില്‍ വന്നതായിരുന്നു രാംനാഥ് റാം. ഇദ്ദേഹം ലോറിക്കു മുകളിലായിരുന്നു ഇരുന്നിരുന്നത്. ലോറി മറിഞ്ഞതോടെ രാംനാഥ് അതിനടിയില്‍ പെടുകയായിരുന്നു. മൃതദേഹം കോഴിക്കോട് മെഡിക്കല്‍ കോളേജ് മോര്‍ച്ചറിയില്‍ സൂക്ഷിച്ചിരിക്കുകയാണ്.