കെഎസ്ആര്‍ടിസി സ്വിഫ്റ്റ് ബസ് കയറിയിറങ്ങി 19കാരിയുടെ കൈയറ്റു

തിരുവനന്തപുരം: കെഎസ്ആര്‍ടിസി സ്വിഫ്റ്റ് ബസ് കയറിയിറങ്ങി ഇരുചക്ര വാഹന യാത്രക്കാരിയായ വിദ്യാര്‍ഥിനിയുടെ കൈയറ്റു. വെഞ്ഞാറമ്മൂട് പുത്തന്‍പാലം നെടുമങ്ങാട് റോഡില്‍ മാര്‍ക്കറ്റ് ജങ്ഷനു സമീപത്ത് ഇന്നലെ വൈകുന്നേരം 5.30 ഓടെയായിരുന്നു സംഭവം. നാഗരുകുഴി സ്വദേശി ഫാത്തിമ(19)യുടെ കൈയാണ് അറ്റുപോയത്.

ഫാത്തിമയും കുറ്റിമൂട് സ്വദേശിനിയായ സഹപാഠി ഷബാന(19)യും പഠനം കഴിഞ്ഞ് ഇരുചക്രവാഹനത്തില്‍ വീട്ടിലേക്കു മടങ്ങുകയായിരുന്നു. ഇതേ ദിശയില്‍ നിന്നു പിന്നിലൂടെ എത്തിയ സ്വിഫ്റ്റ് ബസ് മറികടക്കാന്‍ ശ്രമിക്കുന്നതിനിടെ ഇരുചക്ര വാഹനത്തില്‍ തട്ടുകയായിരുന്നു. സ്‌കൂട്ടര്‍ മറിഞ്ഞ് വാഹനത്തിനു പിറകിലിരുന്ന ഫാത്തിമ തെറിച്ചു വീഴുകയും കൈയിലൂടെ ബസ് കയറിയിറങ്ങുകയുമായിരുന്നു.

ഉടനെ ഇരുവരേയും നാട്ടുകാര്‍ ചേര്‍ന്നു തിരുവനന്തപുരത്തെ സ്വകാര്യ ആശുപത്രിയില്‍ പ്രവേശിപ്പിച്ചു. ഫാത്തിമയുടെ കൈ തുന്നിച്ചേര്‍ക്കുന്നതിനായി സ്വകാര്യ മള്‍ട്ടി സ്‌പെഷ്യാലിറ്റി ആശുപത്രിയിലേക്കു മാറ്റി. ഷബാനയും ഫാത്തിമയും വെഞ്ഞാറമ്മൂടിലെ സ്വകാര്യ മെഡിക്കല്‍ സ്ഥാപനത്തിലെ എംഎല്‍ടി വിദ്യാര്‍ഥിനികളാണ്. ഷബാനയായിരുന്നു വാഹനം ഓടിച്ചിരുന്നത്. വെഞ്ഞാറമ്മൂട് പോലിസ് സ്ഥലത്തെത്തി തുടര്‍ നടപടികള്‍ സ്വീകരിച്ചു.