ഹോങ്കോങ്ങിലെ പാര്‍പ്പിട സമുച്ചയത്തിലെ തീപിടിത്തം; മരണം 44 ആയി, മൂന്നുപേര്‍ അറസ്റ്റില്‍

തായ് പോ: ഹോങ്കോങിലെ തായ് പോയിലെ കെട്ടിട സമുച്ചയത്തിലുണ്ടാ അഗ്‌നിബാധയില്‍ മരിച്ചവരുടെ എണ്ണം 44 ആയി. 62 പേര്‍ക്ക് പരിക്കേറ്റു. 279 ഓളം പേരെ കാണാതായി അഗ്‌നിബാധയില്‍ മൂന്നുപേര്‍ അറസ്റ്റിലായി. പൊള്ളലേറ്റും പുക ശ്വസിച്ചതിനെ തുടര്‍ന്നുള്ള ബുദ്ധിമുട്ടുകളുമായാണ് പലരും ആശുപത്രിയില്‍ പ്രവേശിച്ചത്. തീപിടിത്തമുണ്ടായ ബഹുനില കെട്ടിടത്തിന്റെ അറ്റകുറ്റപ്പണി നടത്തിയിരുന്ന കമ്പനിയുടെ ഉദ്യോഗസ്ഥരാണ് അറസ്റ്റിലായത്.

ഹോങ്കോങ്ങിലെ അഗ്‌നിബാധ അളവുകളില്‍ ഏറ്റവും ഉയര്‍ന്ന അളവായ ലെവല്‍ 5ലുള്ള അഗ്‌നിബാധയാണ് വാങ് ഫുക് കോര്‍ട് എന്ന ബഹുനില ഫ്‌ലാറ്റ് കെട്ടിട സമുച്ചയത്തിലുണ്ടായത്. ഇന്നലെ ഉച്ചകഴിഞ്ഞാണ് കെട്ടിട സമുച്ചയത്തില്‍ അഗ്‌നിബാധയുണ്ടായത്. കെട്ടിടത്തിലെ അറ്റകുറ്റപ്പണികള്‍ക്കായി ചുറ്റും സ്ഥാപിച്ചിരുന്ന മുള കൊണ്ടുള്ള നിര്‍മ്മാണമാണ് തീ വളരെ വേഗത്തില്‍ പല ഭാഗങ്ങളിലേക്ക് പടരാന്‍ കാരണമായത്. തുടര്‍ന്ന് തീജ്വാലകള്‍ പല അപ്പാര്‍ട്ട്മെന്റ് ബ്ലോക്കുകള്‍ക്ക് ചുറ്റുമുള്ള സ്‌കാഫോള്‍ഡിങുകളിലേക്കും നിര്‍മാണ വലകളിലേക്കും പടര്‍ന്നു. ശക്തമായ കാറ്റും നിര്‍മ്മാണ അവശിഷ്ടങ്ങളും തീ വേഗത്തില്‍ പടരാന്‍ കാരണമായി. പല താമസക്കാരും പ്രായമായവരായതിനാല്‍ വേഗത്തില്‍ രക്ഷപ്പെടാന്‍ കഴിഞ്ഞില്ലെന്ന് പ്രദേശവാസികള്‍ പറയുന്നു. അറ്റകുറ്റപ്പണികള്‍ കാരണം ജനലുകള്‍ അടച്ചിട്ടിരുന്നതിനാല്‍ തീപിടുത്തം ഉണ്ടായത് അയല്‍ക്കാര്‍ വിളിച്ചറിയിച്ചപ്പോഴാണ് പലരും അറിഞ്ഞതെന്നും താമസക്കാര്‍ വ്യക്തമാക്കി.

മരിച്ചവരില്‍ 37 വയസുള്ള ഒരു അഗ്‌നിശമന സേനാംഗവും ഉള്‍പ്പെടുന്നു. ചൈനീസ് അതിര്‍ത്തിയോട് ചേര്‍ന്നുള്ള ന്യൂ ടെറിട്ടറീസിലെ തായ് പോയിലാണ് ഈ കെട്ടിട സമുച്ചയം സ്ഥിതി ചെയ്യുന്നത്. ഏഴു നിലകളുള്ള കെട്ടിടങ്ങളിലേക്ക് തീ പടര്‍ന്നു. ഏകദേശം 2,000 ഫ്‌ലാറ്റുകളുള്ള എട്ടു ടവറുകളാണ് ഈ കോംപ്ലക്സിലുള്ളത്. ഉച്ചക്കുശേഷം ആരംഭിച്ച തീപിടുത്തം രാത്രി വൈകിയും നിയന്ത്രിക്കാന്‍ സാധിക്കാതെ വന്നതോടെ അധികൃതര്‍ അപകട നില ലെവല്‍ 5ലേക്ക് ഉയര്‍ത്തി. ചൈനീസ് പ്രസിഡന്റ് ഷി ജിന്‍പിങ്ങും ഹോങ്കോങ്ങ് നേതാവ് ജോണ്‍ ലീയും മരണപ്പെട്ടവര്‍ക്ക് അനുശോചനം അറിയിച്ചു. സംഭവസ്ഥലത്തു നിന്നുള്ള നിരവധി വീഡിയോകള്‍ പ്രചരിച്ചു.