എൻ.ഐ.ടി. കാലിക്കറ്റിൽ സ്‌മാർട്ട് ഇന്ത്യ ഹാക്കത്തോൺ 2025 ഗ്രാൻഡ് ഫിനാലെയ്ക്ക് ഉജ്ജ്വല തുടക്കം.

കോഴിക്കോട്: ലോകത്തിലെ ഏറ്റവും വലിയ ഓപ്പൺ ഇന്നൊവേഷൻ സംരംഭങ്ങളിലൊന്നായ സ്‌മാർട്ട് ഇന്ത്യ ഹാക്കത്തോൺ (എസ്.ഐ.എച്ച്.) 2025 ഗ്രാൻഡ് ഫിനാലെയുടെ (സോഫ്റ്റ്‌വെയർ എഡിഷൻ) ദേശീയ നോഡൽ സെന്ററായി തിരഞ്ഞെടുക്കപ്പെട്ട നാഷണൽ ഇൻസ്റ്റിറ്റ്യൂട്ട് ഓഫ് ടെക്‌നോളജി കാലിക്കറ്റിൽ (എൻ.ഐ.ടി.സി.) ദ്വിദിന നോൺ-സ്റ്റോപ്പ് ഹാക്കത്തോണിന് ഉജ്ജ്വല തുടക്കമായി. രാജ്യത്തിന്റെ വിവിധ ഭാഗങ്ങളിൽ നിന്നുള്ള യുവ കണ്ടുപിടിത്തക്കാർ പങ്കെടുക്കുന്ന മത്സരത്തിൽ, സാങ്കേതിക രംഗത്തെ വനിതാ പങ്കാളിത്തം ഉയർത്തിക്കാട്ടി 40 ശതമാനം വനിതാ വിദ്യാർത്ഥികളും മത്സരിക്കുന്നുണ്ട് എന്നുള്ളത് ശ്രദ്ധേയമാണ്. എൻ.ഐ.ടി. കാലിക്കറ്റിൽ നടന്ന ചടങ്ങിൽ പ്രൊഫ. എൻ. സന്ധ്യറാണി (എൻ.ഐ.ടി. കാലിക്കറ്റ് ഡീൻ - റിസർച്ച് & കൺസൾട്ടൻസി) മുഖ്യാതിഥിയായി പങ്കെടുത്തു, ഉദ്ഘാടനം നിർവ്വഹിച്ചു. എ.ഐ.സി.ടി.ഇ. ഇന്നൊവേഷൻ സെന്റർ മാനേജർ ശ്രീമതി. ഇന്ദു ഗോവിന്ദ് ചടങ്ങിലെ വിശിഷ്ടാതിഥിയായിരുന്നു. 'എൻ.സി.ഐ.ഐ.പി.സി.യിൽ നിന്നുള്ള ഡോ. ധനഞ്ജയ് ശ്രീവാസ്തവ, ശ്രീ. അഭയ് കുമാർ, ശ്രീ. ഉർവേക് കുമാർ ചന്ദ്രവദൻ ഷാ എന്നിവരും, എ.ഐ.സി.ടി.ഇ. നോഡൽ സെന്റർ ഹെഡുമാരായ ശ്രീമതി. അസ്മിത ധില്ലൺ, ശ്രീ. സങ്കേത് ഇനാംദാർ എന്നിവരും പങ്കെടുത്തു. 'മുഖ്യാതിഥി ശ്രീമതി. ഇന്ദു ഗോവിന്ദ് തന്റെ പ്രസംഗത്തിൽ, ഇന്ത്യയിലെ യുവജനങ്ങളിൽ നൂതനാശയങ്ങളും (innovation) പ്രശ്‌നപരിഹാര ശേഷിയും വളർത്തുന്നതിൽ എസ്.ഐ.എച്ച്. വഹിക്കുന്ന സുപ്രധാനവും പരിവർത്തനപരവുമായ പങ്ക് എടുത്തുപറഞ്ഞു. ദേശീയ തലത്തിലുള്ള ഈ ഇവന്റിന് ആതിഥേയത്വം വഹിക്കാൻ എൻ.ഐ.ടി. കാലിക്കറ്റ് നടത്തിയ മികച്ച ഒരുക്കങ്ങളെ വിശിഷ്ടാതിഥികൾ അഭിനന്ദിച്ചു. എൻ.ഐ.ടി. കാലിക്കറ്റ് നോഡൽ സെന്ററിൽ മാത്രം രാജ്യത്തുടനീളമുള്ള സ്ഥാപനങ്ങളിൽ നിന്നുള്ള 20 മികച്ച വിദ്യാർത്ഥി ടീമുകളാണ് മത്സരിക്കുന്നത്.