ജെഇഇ അഡ്വാന്‍സ്ഡ് 2026 മേയ് 17ന്; ഐഐടി പരീക്ഷാ ടൈംടേബിള്‍ പ്രസിദ്ധീകരിച്ചു

ഇന്ത്യന്‍ ഇന്‍സ്റ്റിറ്റിയൂട്ട് ഓഫ് ടെക്‌നോളജിയിലെ (ഐഐടി) ബിരുദ കോഴ്‌സുകളിലേക്കുള്ള പ്രവേശനത്തിനായി നടത്തുന്ന ജെഇഇ (ജോയിന്റ് എന്‍ട്രന്‍സ് എക്‌സാമിനേഷന്‍) അഡ്വാന്‍സ്ഡ് 2026 പരീക്ഷ മേയ് 17നു നടത്തുമെന്ന് അധികൃതര്‍ അറിയിച്ചു. ഐഐടി റൂര്‍ക്കിയുടെ മേല്‍നോട്ടത്തിലാണ് ഈ വര്‍ഷത്തെ പരീക്ഷ സംഘടിപ്പിക്കുന്നത്. പരീക്ഷാ സമയക്രമം ഔദ്യോഗിക വെബ്‌സൈറ്റില്‍ പ്രസിദ്ധീകരിച്ചിട്ടുണ്ട്.

ജെഇഇ മെയിന്‍ പേപ്പര്‍1ല്‍ വിവിധ കാറ്റഗറികളില്‍ നിന്ന് മികവ് തെളിയിച്ച് മുന്നിലെത്തുന്ന 2,50,000 വിദ്യാര്‍ഥികള്‍ക്കാണ് അഡ്വാന്‍സ്ഡ് എഴുതാന്‍ അര്‍ഹത. ജനുവരി, ഏപ്രില്‍ മാസങ്ങളിലായി രണ്ടു ഘട്ടങ്ങളിലായാണ് ജെഇഇ മെയിന്‍ പരീക്ഷ നടത്തുന്നത്. കമ്പ്യൂട്ടര്‍ അധിഷ്ഠിതമായ പരീക്ഷയുടെ ഫലം ഫെബ്രുവരി 12നു പ്രഖ്യാപിക്കും. എന്‍ഐടികള്‍, ഐഐഐടികള്‍, കേന്ദ്ര ധനസഹായത്തോടെ പ്രവര്‍ത്തിക്കുന്ന മറ്റു സാങ്കേതിക സ്ഥാപനങ്ങള്‍ (സിഎഫ്ടിഐ), സംസ്ഥാന സര്‍ക്കാര്‍ അംഗീകരിച്ചിരിക്കുന്ന എന്‍ജിനീയറിങ്ങ് സ്ഥാപനങ്ങള്‍ എന്നിവയിലെ ബിരുദ എന്‍ജിനീയറിങ്ങ് (ബിഇ/ബിടെക്) പ്രവേശനത്തിനാണ് ജെഇഇ മെയിന്‍ പേപ്പര്‍ 1 സംഘടിപ്പിക്കുന്നത്. രാജ്യത്തെ ബിആര്‍ക്ക്, ബിപ്ലാനിങ് കോഴ്‌സുകളിലേക്കുള്ള പ്രവേശനത്തിനാണ് പേപ്പര്‍ 2 നടത്തുന്നത്.

ജെഇഇ മെയിന്‍ പരീക്ഷ, ജെഇഇ അഡ്വാന്‍സ്ഡിന് പ്രവേശനയോഗ്യത ഉറപ്പാക്കുന്ന പ്രാഥമിക പരീക്ഷയായും പ്രവര്‍ത്തിക്കുന്നു. കൂടുതല്‍ വിവരങ്ങള്‍ക്ക് ഔദ്യോഗിക വെബ്‌സൈറ്റ് സന്ദര്‍ശിക്കുക: jeeadv.ac.in