വടക്കഞ്ചേരി അപകടം: ഡ്രൈവറുടെ രക്തസാമ്പിള് പരിശോധനക്ക് അയച്ചു; മനപ്പൂര്വമുള്ള നരഹത്യക്ക് കേസെടുത്തു
പാലക്കാട്: വടക്കഞ്ചേരി അഞ്ചുമൂര്ത്തിമംഗലം വാഹനാപകടത്തില് ഡ്രൈവറുടെ രക്തസാമ്പിള് പരിശോധനക്ക് അയച്ചു. കൊച്ചി കാക്കനാടുള്ള ലാബിലേക്കാണ് പരിശോധനക്ക് അയച്ചത്. മദ്യപിച്ചിരുന്നോ എന്ന് സ്ഥിരീകരിക്കാനാണ് സാമ്പിള് അയച്ചത്. ആലത്തൂര് താലൂക്ക് ആശുപത്രിയില് നിന്നാണ് രക്ത സാമ്പിള് എടുത്തത്.
അതെ സമയം വാഹനാപകടത്തിന് കാരണം ടൂറിസ്റ്റ് ബസ് െ്രെഡവറുടെ അശ്രദ്ധയാണെന്ന റിപ്പോര്ട്ട് പുറത്തുവന്നു. ട്രാന്സ്പോര്ട്ട് കമ്മീഷണര് എസ് ശ്രീജിത്ത് ഗതാഗതമന്ത്രി ആന്റണി രാജുവിന് നല്കിയ പ്രാഥമിക റിപ്പോര്ട്ടിലാണ് അപകടകാരണം വ്യക്തമാക്കുന്നത്. പുലര്ച്ചെ വേളാങ്കണി യാത്ര കഴിഞ്ഞ് മടങ്ങിയെത്തിയ െ്രെഡവര് രാത്രി വീണ്ടും വാഹനം ഓടിച്ചതായും ഇടതുവശത്തു കൂടി കാറിനെ മറികടക്കാന് ശ്രമിച്ചപ്പോഴാണ് അപകടമുണ്ടായതെന്നും റിപ്പോര്ട്ട് വ്യക്തമാക്കുന്നു.
അറസ്റ്റിലായ ഡ്രൈവര് ജോമോനെതിരെ കൂടുതല് വകുപ്പുകള് ചുമത്തിയേക്കും. മനപ്പൂര്വമുള്ള നരഹത്യക്കാണ്(304 വകുപ്പ്) ജോമോനെതിരെ കേസെടുത്തത്. ജോമോന്റെ ലൈസന്സ് മോട്ടോര് വാഹനവകുപ്പ് റദ്ദാക്കും. മറ്റു സംസ്ഥാനങ്ങളില് ജോമോന് വാഹനം ഗതാഗത നിയമലംഘനം നടത്തിയോയെന്നും പോലിസ് പരിശോധിക്കും. ഡ്രൈവറുടെ മുന്കാല പശ്ചാത്തലവും പരിശോധനാ വിധേയമാക്കും. ഇന്നലെ വൈകീട്ട് ജോമോന്റെ വൈദ്യപരിശോധന പൂര്ത്തിയാക്കിയിരുന്നു. ഇന്നലെ വൈകീട്ടോടെയാണ് തിരുവനന്തപുരത്തേക്ക് കടക്കാന് ശ്രമിച്ച ജോമോനെ കൊല്ലം ചവറയില് വച്ച് പൊലീസ് പിടികൂടിയത്. ബുധനാഴ്ച രാത്രി അപകടത്തിന് പിന്നാലെ ആശുപത്രിയില് ചികിത്സ തേടിയ ജോമോന് അവിടെനിന്ന് മുങ്ങുകയായിരുന്നു.വടക്കഞ്ചേരി പൊലീസിന്റെ കസ്റ്റഡിയിലാണ് നിലവില് ജോമോനുള്ളത്.