കൊവിഡ് വ്യാപനം: തമിഴ്നാട്ടിൽ ഞായറാഴ്ചകളിൽ സമ്പൂർണ ലോക്ക് ഡൗൺ

ചെന്നൈ: കൊവിഡ് കേസുകളിൽ വീണ്ടും വർധനവ് ഉണ്ടായതോടെ ഞായറാഴ്ചകളിൽ സമ്പൂർണ്ണ ലോക്ക് ഡൗൺ ഏർപ്പെടുത്തി തമിഴ്നാട്. തമിഴ്നാട് ആരോഗ്യമന്ത്രി സുബ്രഹ്മണ്യനാണ് ഇതുസംബന്ധിച്ച പ്രഖ്യാപനം നടത്തിയത്. കൊവിഡ് പ്രതിരോധത്തിനായി ശനിയാഴ്ച മെഗാ വാക്സിനേഷൻ കാംപ് സംഘടിപ്പിക്കുമെന്നും അദ്ദേഹം പറഞ്ഞു.

കൊവിഡ് സാഹചര്യത്തിൽ ഏർപ്പെടുത്തുന്ന കൂടുതൽ നിയന്ത്രണങ്ങൾ സംബന്ധിച്ച് മുഖ്യമന്ത്രി ഔദ്യോഗിക ഉത്തരവ് പുറത്തിറക്കുമെന്നും ആരോഗ്യമന്ത്രി വ്യക്തമാക്കി. ചെന്നൈ കോർപറേഷൻ പരിധിയിൽ വിവാഹം, പൊതുചടങ്ങുകൾ എന്നിവയിൽ പങ്കെടുക്കാവുന്ന ആളുകളുടെ എണ്ണത്തിൽ കുറവ് വരുത്തിയിട്ടുണ്ട്.

നിലവിൽ ഒന്നു മുതൽ 8 വരെയുള്ള ക്ലാസുകൾക്കു നേരിട്ടുള്ള അധ്യയനം ഒഴിവാക്കിയിട്ടുണ്ട്. മറ്റ് വിദ്യാഭ്യാസ സ്ഥാപനങ്ങളിലും കൂടുതൽ നിയന്ത്രണങ്ങൾ ഏർപ്പെടുത്തിയേക്കുമെന്നാണ് റിപ്പോർട്ട്. സംസ്ഥാനത്ത് ചെന്നൈ ഉൾപ്പെടെയുള്ള അഞ്ച് ജില്ലകളിലാണ് ഭൂരിഭാഗം കൊവിഡ് കേസുകളും റിപോർട്ട് ചെയ്യുന്നത്.

ഇന്നലെ 2731 കൊവിഡ് കേസുകളാണ് സംസ്ഥാനത്ത് റിപ്പോര്‍ട്ട് ചെയ്തതോടെ സംസ്ഥാനത്ത് ഇതുവരെ 27,55,587 പേര്‍ക്ക് വൈറസ് സ്ഥിരീകരിച്ചതായി തമിഴ്‌നാട് ആരോഗ്യ മന്ത്രാലയം അറിയിച്ചു. ഇന്നലെ ഒന്‍പത് പേരാണ് വൈറസ് ബാധയെ തുടര്‍ന്ന് മരിച്ചത്. ഇതോടെ മരിച്ചവരുടെ എണ്ണം 36,805 ആയി.

അതേസമയം രാജ്യത്ത് പ്രതിദിന കൊവിഡ് ബാധ 58,000 കടന്നിരിക്കുകയാണ്. ഒമിക്രോൺ കേസുകളിലും വർധനവുണ്ട്. ഇന്ന് കേന്ദ്ര ആരോഗ്യമന്ത്രാലയം പുറത്തുവിട്ട കണക്കുകൾ പ്രകാരം 58,097 പേർക്കാണ് കൊവിഡ്- 19 സ്ഥിരീകരിച്ചിരിക്കുന്നത്. 24 മണിക്കൂറിനിടെ 534 മരണങ്ങളും സ്ഥിരീകരിച്ചു. രാജ്യത്തെ ആകെ ഒമിക്രോൺ ബാധിതരുടെ എണ്ണം 2,135 ആയും ഉയർന്നിരിക്കുകയാണ്.