തായ്‌പേയ്: തായ്‌വാനില്‍ തിങ്കളാഴ്ച രാത്രിയും ചൊവ്വാഴ്ച പുലര്‍ച്ചെയുമായി എണ്‍പതോളം ഭൂചലനങ്ങള്‍ റിപോര്‍ട്ട് ചെയ്തു. കിഴക്കന്‍ കൗണ്ടിയായ ഹുവാലീനിലാണ് തുടര്‍ ചലനങ്ങളുണ്ടായത്. ഏറ്റവും തീവ്രതയേറിയ ഭൂചലനം ഭൂകമ്പമാപിനിയില്‍ 6.3 തീവ്രത രേഖപ്പെടുത്തി. ഏപ്രില്‍ മൂന്നിന് ഹുവാലീനിലുണ്ടായ ഭൂചലനത്തില്‍ 14 പേര്‍ മരണപ്പെടുകയും വന്‍ നാശനഷ്ടം ഉണ്ടാവുകയും ചെയ്തിരുന്നു. അന്ന് 7.2 തീവ്രതയാണ് രേഖപ്പെടുത്തിയത്. അതിനു ശേഷം മേഖലയില്‍ ഇതുവരെ ആയിരത്തോളം തുടര്‍ചലനങ്ങള്‍ അനുഭവപ്പെട്ടതായാണ് റിപോര്‍ട്ട്. തിങ്കളാഴ്ച രാത്രിയും ചൊവ്വാഴ്ച പുലര്‍ച്ചെയും അനുഭവപ്പെട്ട ഭൂചലനത്തില്‍ തായ്‌പേയില്‍ കെട്ടിടങ്ങള്‍ തകര്‍ന്നു. അതേസമയം ഭൂകമ്പത്തില്‍ ആളപായമൊന്നും രേഖപ്പെടുത്തിയിട്ടില്ല.