കാസര്കോഡ് ഹനാന് ഷായുടെ സംഗീത പരിപാടിയ്ക്കിടെ തിക്കും തിരക്കും; ഇരുപതിലേറെ പേര് ആശുപത്രിയില്
കാസര്കോട്: ഹനാന് ഷായുടെ സംഗീതപരിപാടിയ്ക്കിടെ തിക്കിലും തിരക്കിലുംപെട്ട് ഇരുപതിലേറെ പേര്ക്ക് പരുക്ക്. ഉള്ക്കൊള്ളാവുന്നതിലുമേറെ ആളുകള് പരിപാടിയ്ക്ക് എത്തിയതാണ് അപകടകാരണം. ജനക്കൂട്ടത്തെ പിരിച്ചുവിടാന് പോലിസ് ലാത്തിവീശി. ഒട്ടേറെപ്പേര് കുഴഞ്ഞുവീണുവെന്നാണ് വിവരം. തിരക്ക് നിയന്ത്രണാതീതമായതോടെ സംഗീത പരിപാടി പിന്നീട് അവസാനിപ്പിച്ചു. പോലിസിന്റെ നിര്ദേശപ്രകാരമാണ് പരിപാടി അവസാനിപ്പിച്ചത്.
കാസര്കോട് പുതിയ ബസ്റ്റാന്ഡിനു സമീപമുള്ള മൈതാനത്താണ് പരിപാടി നടന്നത്. സംഗീത പരിപാടി ആരംഭിക്കുന്നതിന് മുന്പേ ആളുകള് ഇവിടെ തടിച്ചുകൂടുകയായിരുന്നു. ഇതും തിക്കും തിരക്കും ഉണ്ടാകാന് കാരണമായി. ഇരുപതോളം പേരാണ് ദേഹാസ്വാസ്ഥ്യം അനുഭവപ്പെട്ട് സ്വകാര്യ ആശുപത്രികളില് ചികിത്സ തേടിയത്.
അപകട വിവരമറിഞ്ഞ് ജില്ലാ പോലിസ് മേധാവി ബി.വി. വിജയ്ഭാരത് റെഡ്ഡിയുടെ നേതൃത്വത്തിലുള്ള പോലിസ് സംഘം സ്ഥലത്തെത്തി. ജില്ലാ പൊലീസ് മോധാവി തന്നെ ജാഗ്രത പാലിക്കണമെന്ന് മൈക്കിലൂടെ മുന്നറിയിപ്പ് നല്കി. ഇതിനിടെ പരിപാടി കാണാനായി എത്തിയവരെ പാതയോരത്ത് വച്ച് പോലിസ് ലാത്തി വീശി വിരട്ടിയോടിച്ചു. ചിലര് കുറ്റിക്കാട്ടിലെ കുഴിയില് വീണു. അപകടത്തില് പെട്ടവരുടെ നില ഗുരുതരമല്ലെന്നും സ്ഥിതിഗതികള് നിയന്ത്രണ വിധേയമാണെന്നും പോലിസ് പറഞ്ഞു.