പ്രതിപക്ഷത്തിന്റെ ഉപരാഷ്ട്രപതി സ്ഥാനാര്ഥി മാര്ഗരറ്റ് ആല്വ
1974 മുതല് 1998വരെ രാജ്യസഭ അംഗമായിരുന്നു. 1984മുതല് 85വരെ പാര്ലമെന്റരികാര്യ സഹമന്ത്രിയായും പ്രവര്ത്തിച്ചു. 1999ല് ഉത്തര കര്ണാടക മണ്ഡലത്തില് നിന്ന് ലോക്സഭയിലേക്ക് തിരഞ്ഞെടുക്കപ്പെട്ടു.
ന്യൂഡല്ഹി: ഉപരാഷ്ട്രപതി തിരഞ്ഞെടുപ്പില് പ്രതിപക്ഷത്തിന്റെ സംയുക്ത സ്ഥാനാര്ത്ഥിയെ പ്രഖ്യാപിച്ചു. കോണ്ഗ്രസ് നേതാവും മുന് കേന്ദ്ര മന്ത്രിയുമായ മാര്ഗരറ്റ് ആല്വയാണ് പ്രതിപക്ഷത്തിന്റെ സ്ഥാനാര്ത്ഥി. പ്രതിപക്ഷ കക്ഷികളുടെ യോഗത്തിന് ശേഷം എന്സിപി അധ്യക്ഷന് ശരദ് പവാറാണ് ഉപരാഷ്ട്രപതി സ്ഥാനാര്ത്ഥിയെ പ്രഖ്യാപിച്ചത്. ഗുജറാത്ത്, രാജസ്ഥാന്, ഉത്തരാഖണ്ഡ് സംസ്ഥാനങ്ങളില് ഇവര് ഗവര്ണറായും പ്രവര്ത്തിച്ചിട്ടുണ്ട്. 1942ല് കര്ണാകടയിലെ മംഗലൂരുവില് ജനിച്ച മാര്ഗരറ്റ്, വിദ്യാര്ത്ഥി രാഷ്ട്രീയത്തിലൂടെയാണ് പൊതുരംഗത്തേക്ക് പ്രവേശിക്കുന്നത്.
1974 മുതല് 1998വരെ രാജ്യസഭ അംഗമായിരുന്നു. 1984മുതല് 85വരെ പാര്ലമെന്റരികാര്യ സഹമന്ത്രിയായും പ്രവര്ത്തിച്ചു. 1999ല് ഉത്തര കര്ണാടക മണ്ഡലത്തില് നിന്ന് ലോക്സഭയിലേക്ക് തിരഞ്ഞെടുക്കപ്പെട്ടു.
17 പാര്ട്ടികളാണ് പവാറിന്റെ വസതിയില് നടന്ന യോഗത്തില് പങ്കെടുത്തത്. അതേസമയം, തൃണമൂലിന്റെ പ്രതിനിധികളാരും എത്തിയിരുന്നില്ല. എന്നാല് തൃണമൂല് ഉള്പ്പെടെ 19 പാര്ട്ടികളുടെ പിന്തുണ മാര്ഗരറ്റ് ആല്വയ്ക്ക് ഉണ്ടാകുമെന്ന് ശരദ് പവാര് പറഞ്ഞു. നേരത്തെ പ്രതിപക്ഷ സ്ഥാനാര്ത്ഥികള്ക്കൊപ്പം നിലയുറപ്പിക്കുകയും പിന്നീട് ദ്രൗപദി മുര്മുവിന് പിന്തുണ പ്രഖ്യാപിക്കുകയും ചെയ്ത പാര്ട്ടികളും ശരദ് പവാര് വിളിച്ച യോഗത്തില് എത്തിയിരുന്നു.
അതേസമയം, പശ്ചിമ ബംഗാള് ഗവര്ണര് ജഗദീപ് ധന്കറിനെ നേരത്തെ എന്ഡിഎ ഉപരാഷ്ട്രപതി സ്ഥാനാര്ത്ഥിയായി പ്രഖ്യാപിച്ചിരുന്നു. ബിജെപി ദേശീയ അധ്യക്ഷന് ജെ പി നഡ്ഡയാണ് ധനകറിന്റെ സ്ഥാനാര്ത്ഥിത്വം പ്രഖ്യാപിച്ചത്.
ഉപരാഷ്ട്രപതി തെരഞ്ഞെടുപ്പ് തീയതി കഴിഞ്ഞ ദിവസം കേന്ദ്ര തെരഞ്ഞെടുപ്പ് കമ്മീഷന് പ്രഖ്യാപിച്ചിരുന്നു. ജൂലൈ 19 വരെയാണ് നാമനിര്ദ്ദേശ പത്രികകള് സമര്പ്പിക്കാനുള്ള സമയം. സൂക്ഷ്മപരിശോധന 20ന് നടക്കും. 21 വരെ നാമനിര്ദ്ദേശ പത്രികകള് പിന്വലിക്കാം. ആഗസ്റ്റ് ആറിനാവും വോട്ടെടുപ്പ്. അന്നു തന്നെ വോട്ടെണ്ണല് നടക്കും. രാജ്യസഭയിലെ 233 രാജ്യസഭാ അംഗങ്ങളും ലോക്സഭയിലെ 543 അംഗങ്ങളുമാണ് ഉപരാഷ്ട്രപതി തെരഞ്ഞെടുപ്പില് വോട്ടു ചെയ്യുക. നിലവിലെ ഉപരാഷ്ട്രപതി വെങ്കയ്യ നായിഡുവിന്റെ കാലാവധി ഓഗസ്റ്റ് പത്തിനാണ് തീരുക.