മഹാരാഷ്ട്രയില് സിബിഐക്ക് നേരിട്ട് അന്വേഷിക്കാനുള്ള അനുമതി പിന്വലിച്ചു
റിപ്പബ്ലിക് ടിവിയെക്കുറിച്ച് റേറ്റിംഗ് അഴിമതിയില് ഉത്തര്പ്രദേശില് വന്ന പരാതിയുടെ അടിസ്ഥാനത്തില് സിബിഐ കേസ് ഫയല് ചെയ്തതിന് മണിക്കൂറുകള്ക്ക് ശേഷമാണ് മഹാരാഷ്ട്ര സര്ക്കാര് സിബിഐ അന്വേഷണത്തിനുള്ള ജനറല് കണ്സെന്റ് നീക്കം ചെയ്തത്.
മുംബൈ: മഹാരാഷ്ട്രയില് സിബിഐക്ക് നേരിട്ട് അന്വേഷിക്കാനുള്ള അനുമതി പിന്വലിച്ചു. ടിആര്പി കേസില് സിബിഐ എഫ്ഐആര് രജിസ്റ്റര് ചെയ്തതിനു പിന്നാലെയാണ് ഈ നടപടി. സിബിഐയ്ക്ക് ഇനി മുതല് ഓരോ കേസിലും അന്വേഷിക്കാന് സര്ക്കാറിന്റെ പ്രത്യേകം അനുമതി വേണം.
റിപ്പബ്ലിക് ടിവി അടക്കം മൂന്ന് ചാനലുകള് ടിആര്പി റേറ്റിങ്ങില് കൃത്രിമം നടത്തിയെന്ന കേസില് മഹാരാഷ്ട്ര പോലിസ് അന്വേഷണം നടത്തുകയും അര്ണബ് ഗോസ്വാമിയോട് ഹാജരാകുവാന് നിര്ദ്ദേശിച്ചിരിക്കുകയാണ്. അതിനിടെ, റിപ്പബ്ലിക് ടിവിയെക്കുറിച്ച് റേറ്റിങ് അഴിമതിയില് ഉത്തര്പ്രദേശില് വന്ന പരാതിയുടെ അടിസ്ഥാനത്തില് സിബിഐ കേസ് ഫയല് ചെയ്തതിന് മണിക്കൂറുകള്ക്ക് ശേഷമാണ് മഹാരാഷ്ട്ര സര്ക്കാര് സിബിഐ അന്വേഷണത്തിനുള്ള ജനറല് കണ്സെന്റ് നീക്കം ചെയ്തത്. എന്നാല് മഹാരാഷ്ട്ര സര്ക്കാരിന്റെ നടപടിയെ വിമര്ശിച്ച് കേന്ദ്രസര്ക്കാരും ബിജെപിയും രംഗത്തെത്തി. മാധ്യമ സ്വാതന്ത്ര്യത്തിന് വെല്ലുവിളിയാണ് ഈ നടപടിയെന്നാണ് വിമര്ശനം
ഡല്ഹി സ്പെഷ്യല് പോലിസ് എസ്റ്റാബിഷ്മെന്റ് ആക്ടിലെ സെക്ഷന് 6 പ്രകാരമുള്ള അധികാരം വിനിയോഗിക്കുന്നതില് അനുമതി സര്ക്കാര് ഉത്തരവിലൂടെ പിന്വലിക്കുകയാണെന്ന് ഡെപ്യൂട്ടി സെക്രട്ടറി കൈലാസ് ഗെയ്ക്വാദ് ഉത്തരവില് പറയുന്നു. ഡല്ഹി സ്പെഷ്യല് പോലിസ് എസ്റ്റാബ്ലിഷ്മെന്റ് ആക്ടാണ് സിബിഐയെ നിയന്ത്രിക്കുന്നത്. അതേസമയം, പുതിയ ഉത്തരവ് നിലവിലെ കേസുകളെ ബാധിക്കില്ലെന്നാണ് സൂചന. ബോളിവുഡ് നടന് സുശാന്ത് സിംഗ് രാജപുതിന്റെ മരണം, ഉത്തര്പ്രദേശ് പോലീസ് രജിസ്റ്റര് ചെയ്ത ടിആര്പി കേസ് എന്നിവയെ ബാധിച്ചേക്കില്ല. സുശാന്ത് സിംഗ് കേസ് മുംബൈ പോലിസ് ആണ് ആദ്യം അന്വേഷിച്ചിരുന്നത്. എന്നാല് സുശാന്തിന്റെ പിതാവിന്റെ പരാതിയെ തുടര്ന്ന് കേസ് പിന്നീട് സിബിഐയ്ക്ക് കൈമാറുകയായിരുന്നു.
നേരത്തെ മഹാരാഷ്ട്ര സര്ക്കാരിന് സമാനമായി പ്രതിപക്ഷ പാര്ട്ടികള് ഭരിക്കുന്ന ബംഗാള്, ആന്ധ്രാപ്രദേശ്, ഛത്തീസ്ഗഡ് രാജസ്ഥാന് എന്നീ സംസ്ഥാനങ്ങളും ഇത്തരത്തില് സിബിഐക്ക് നേരിട്ട് അന്വേഷിക്കാനുള്ള അനുമതി പിന്വലിച്ചിരുന്നു