തദ്ദേശ തിരഞ്ഞെടുപ്പ്; പുതിയ അംഗങ്ങളുടെ സത്യപ്രതിജ്ഞ 21 ന്, മാര്ഗനിര്ദ്ദേശങ്ങള് പുറപ്പെടുവിച്ച് തിരഞ്ഞെടുപ്പ് കമ്മീഷന്
തിരുവനന്തപുരം: തദ്ദേശസ്വയംഭരണ സ്ഥാപനങ്ങളിലേക്ക് തിരഞ്ഞെടുക്കപ്പെട്ട അംഗങ്ങള് ഡിസംബര് 21 ന് സത്യപ്രതിജ്ഞ ചെയ്ത് അധികാരമേല്ക്കണമെന്ന് സംസ്ഥാന തിരഞ്ഞെടുപ്പ് കമ്മീഷന് അറിയിച്ചു. ഇത് സംബന്ധിച്ച മാര്ഗനിര്ദ്ദേശങ്ങള് കമ്മീഷന് പുറപ്പെടുവിച്ചു.
ഗ്രാമ പഞ്ചായത്ത്, ബ്ലോക്ക് പഞ്ചായത്ത്, ജില്ലാ പഞ്ചായത്ത്, മുനിസിപ്പല് കൗണ്സിലുകള് എന്നിവിടങ്ങളില് രാവിലെ 10നും കോര്പ്പറേഷനുകളില് 11.30 നുമാണ് സത്യപ്രതിജ്ഞ നടപടികള് ആരംഭിക്കുക. ചടങ്ങുകള്ക്ക് പഞ്ചായത്തുകളില് പഞ്ചായത്ത് ഡപ്യൂട്ടി ഡയറക്ടര്മാരും ബ്ലോക്ക് പഞ്ചായത്തില് അസിസ്റ്റന്ഡ് ഡവലപ്മെന്റ് കമ്മീഷണര്മാരും മുനിസിപ്പാലിറ്റികളിലും കോര്പറേഷനുകളും അതാത് തദ്ദേശ സ്ഥാപനങ്ങളിലെ സെക്രട്ടറിമാരും ജില്ലാ പഞ്ചായത്തുകളില് ജില്ലാ കളക്ടര്മാരുമാണ് ആവശ്യമായ ക്രമീകരണങ്ങള് ചെയ്യേണ്ടത്. ബ്ലോക്ക്- ജില്ലാ പഞ്ചായത്ത്, മുനിസിപ്പാലിറ്റികളിലെ ആദ്യ അംഗത്തിനെ അതത് സ്ഥാപനങ്ങളിലെ വരണാധികാരികള് സത്യപ്രതിജ്ഞ ചെയ്യിക്കണം. കോര്പറേഷനുകളെ സംബന്ധിച്ച് ബന്ധപ്പെട്ട ജില്ലാ കളക്ടര്മാരാണ് ആദ്യ അംഗത്തെ സത്യപ്രതിജ്ഞ ചെയ്യിക്കേണ്ടത്.
ഓരോ തദ്ദേശ സ്ഥാപനങ്ങളിലേക്കും തെരഞ്ഞെടുക്കപ്പെട്ട ഏറ്റവും പ്രായം കൂടിയ അംഗത്തെ നാമനിര്ദേശം ചെയ്തിട്ടുള്ള ഉദ്യോഗസ്ഥന് കണ്ടെത്തി, അംഗത്തെ നിശ്ചയിക്കപ്പെട്ട രീതിയില് പ്രതിജ്ഞ എടുക്കുന്നതിന് തദ്ദേശ സ്വയംഭരണ സ്ഥാപനത്തില് ഹാജരാകാന് രേഖാമൂലം നിര്ദ്ദേശിക്കണം.
തദ്ദേശ സ്ഥാപനങ്ങളിലെ പ്രതിജ്ഞാ ചടങ്ങുകള് ഏകോപിപ്പിച്ച് നടപ്പാക്കുന്നതിനുള്ള മേല്നോട്ടം ജില്ലാ കളക്ടര്മാര്ക്കായിരിക്കും. ഓരോ തദ്ദേശ സ്ഥാപനത്തിലെയും തെരഞ്ഞെടുക്കപ്പെട്ട എല്ലാ അംഗങ്ങളും നിശ്ചയിച്ചിട്ടുള്ള തീയതിയില് ബന്ധപ്പെട്ട തദ്ദേശസ്വയംഭരണ സ്ഥാപനങ്ങളില് പ്രതിജ്ഞയെടുക്കല് ചടങ്ങിന് സംബന്ധിക്കണമെന്നാവശ്യപ്പെട്ട് രേഖാമൂലം അറിയിപ്പ് നല്കണം. തദ്ദേശ സ്ഥാപനങ്ങളിലെ മറ്റ് അംഗങ്ങളെ ആദ്യം സത്യപ്രതിജ്ഞ ചെയ്ത അംഗം സത്യപ്രതിജ്ഞ ചെയ്യിക്കണം. സത്യപ്രതിജ്ഞാ ചടങ്ങുമായി ബന്ധപ്പെട്ട പ്രവര്ത്തനങ്ങള് സമയബന്ധിതമായി നടക്കുന്നുണ്ടെന്ന് ജില്ലാ തിരഞ്ഞെടുപ്പ് ഉദ്യോഗസ്ഥര് നിരീക്ഷിച്ച് കമ്മീഷന് റിപോര്ട്ട് സമര്പ്പിക്കണം.