ഐഎന്ഡി ഐഎ എന്ന എന്ന പേരില് മത്സരിക്കാന് പ്രതിപക്ഷ പാര്ട്ടികളുടെ ഐക്യ സമ്മേളനം തീരുമാനിച്ചതായി എന്സിപി ശരദ് പവാര് വിഭാഗം നേതാവ് ഡോ. ജിതേന്ദ്ര അവ്ഹാദ് ട്വീറ്റ് ചെയ്തു. സഖ്യത്തിന് ഐഎന്ഡി ഐഎ(INDIA) എന്ന പേരിടാനുള്ള നിര്ദേശം യോഗത്തില് രാഹുല് ഗാന്ധിയാണ് മുന്നോട്ടുവച്ചതെന്നും അദ്ദേഹത്തിന്റെ സര്ദാത്മകത ഏറെ പ്രശംസിക്കപ്പെട്ടെന്നും മറ്റെല്ലാ പാര്ട്ടികളും ഇത് അംഗീകരിച്ചെന്നും അദ്ദേഹം പറഞ്ഞു. 2024ല് ടീം ഇന്ത്യയും ടീം എന്ഡിഎയും തമ്മിലാണ് മല്സരമെന്ന് ശിവസേന (യുബിടി) രാജ്യസഭാ എംപി പ്രിയങ്ക ചതുര്വേദി ട്വീറ്റ് ചെയ്തു. യോഗത്തിന് പിന്നാലെ ചക്ദേ ഇന്ത്യ എന്ന് തൃണമൂല് കോണ്ഗ്രസ് എംപി ഡെറിക് ഒബ്രിയാനും ട്വീറ്റ് ചെയ്തു. ഇന്ത്യ വിജയിക്കും എന്ന് കോണ്ഗ്രസ് ലോക്സഭാ എംപി മാണിക്കം ടാഗൂര് ട്വീറ്റ് ചെയ്തു.
അതേസമയം, ഇത് ഇന്ത്യയുടെ ശബ്ദത്തിനായുള്ള പോരാട്ടമായതിനാലാണ് ഇന്ത്യ എന്ന പേര് തിരഞ്ഞെടുത്തതെന്ന് യോഗത്തില് രാഹുല് പറഞ്ഞു. പോരാട്ടം ഇന്ത്യയും എന്ഡിഎയും തമ്മിലാണ്. നരേന്ദ്ര മോദിയും ഇന്ത്യയും തമ്മിലാണ്. ബിജെപിയുടെ പ്രത്യയശാസ്ത്രവും ഇന്ത്യയും തമ്മിലാണ്. രാജ്യത്തിന്റെ ഭരണഘടനയേയും ജനങ്ങളുടെ ശബ്ദത്തേയും ഈ മഹത്തായ രാജ്യത്തിന്റെ ആശയത്തേയും ഞങ്ങള് സംരക്ഷിക്കും. ഇന്ത്യയുടെ ആശയത്തെ ഒരാള് ഏറ്റെടുക്കുമ്പോള് ആരാണ് വിജയിക്കുകയെന്ന് നമുക്ക് എല്ലാവര്ക്കും അറിയാമെന്നും രാഹുല് പറഞ്ഞു. കഴിഞ്ഞമാസം 23ന് പട്നയില്ചേര്ന്ന കൂട്ടായ്മയുടെ തുടര്ച്ചയായാണ് ഇന്ന് ബെംഗളൂരുവില് പ്രതിപക്ഷപാര്ട്ടികളുടെ രണ്ടാം യോഗം നടന്നത്. പട്നയില് 15 പാര്ട്ടികളാണ് പങ്കെടുത്തിരുന്നതെങ്കില് ഇത്തവണ 26 പ്രതിപക്ഷ പാര്ട്ടികളില് നിന്നായി 49 നേതാക്കള് ബെംഗളൂരുവിലെ യോഗത്തില് പങ്കെടുത്തു.