വര്ക്കലയില് വീടിന് തീപിടിച്ച് കുടുംബത്തിലെ അഞ്ചുപേര് വെന്തുമരിച്ചു
പുലര്ച്ചെ വീട്ടില് നിന്ന് തീയും പുകയും ഉയരുന്നത് കണ്ട അയല്വാസികളാണ് വിവരം അഗ്നിരക്ഷാസേനയെ അറിയിച്ചത്.
തിരുവനന്തപുരം: വര്ക്കലയില് ഇരുനില വീടിന് തീപിടിച്ച് കുടുംബത്തിലെ അഞ്ചുപേര് വെന്തുമരിച്ചു. വര്ക്കല അയന്തിയിലാണ് ദാരുണമായ സംഭവം. വര്ക്കല പുത്തന്ചന്തയില് പച്ചക്കറി നടത്തുന്ന പ്രതാപന്റെ കുടുംബമാണ് മരിച്ചത്.
പ്രതാപന് (64), ഭാര്യ ഷെര്ലി (53), ഇവരുടെ ഇളയ മകന് അഖില് (25), മൂത്ത മകൻ നിഖിലിന്റെ ഭാര്യ അഭിരാമി (24), ഇവരുടെ എട്ടു മാസം പ്രായമായ കുഞ്ഞ് എന്നിവരാണ് മരിച്ചത്. നിഖില് ഗുരുതരമായി പൊള്ളലേറ്റ് തിരുവനന്തപുരത്തെ സ്വകാര്യ ആശുപത്രിയില് ചികിൽസയിലാണ്. നിഖിലിന്റെ ആരോഗ്യസ്ഥിതി അതീവ ഗുരുതരമാണെന്നാണ് റിപോര്ട്ട്.
പുലര്ച്ചെ വീട്ടില് നിന്ന് തീയും പുകയും ഉയരുന്നത് കണ്ട അയല്വാസികളാണ് വിവരം അഗ്നിരക്ഷാസേനയെ അറിയിച്ചത്. അഗ്നിരക്ഷാസേന എത്തുമ്പോഴേക്കും വീട്ടില് തീ ആളിക്കത്തുകയായിരുന്നു. വീടിന്റെ മുഴുവന് മുറികളിലേയ്ക്കും തീ പടര്ന്നിരുന്നു. ഏറെ പണിപ്പെട്ടാണ് വെളുപ്പിന് ആറു മണിയോടെ ഒരുവിധം തീയണയ്ക്കാന് കഴിഞ്ഞത്. വീടിന്റെ മുന്വശത്ത് നിര്ത്തിയിട്ടിരുന്ന ഇരുചക്രവാഹനങ്ങള്ക്കും തീപിടിച്ചു. പോർച്ചിൽ നിർത്തിയിട്ട ഇരുചക്ര വാഹനങ്ങൾക്കാണ് ആദ്യം തീപിടിച്ചതായി കണ്ടതെന്ന് ദൃക്സാക്ഷികൾ പറഞ്ഞു.