യുകെയില് മൂന്നുമാസത്തിനുള്ളില് കൊവിഡ് വാക്സിന് വിപണിയിലിറക്കുമെന്ന് റിപോര്ട്ടുകള്
ലണ്ടന്: യുകെയില് മൂന്നുമാസത്തിനുള്ളില് കൊവിഡ് വാക്സിന് വിപണിയിലിറക്കുമെന്ന് റിപോര്ട്ടുകള്. 2021 ആരംഭിക്കുന്നതിനു മുമ്പായി വാക്സിന് അനുമതി ലഭിക്കുമെന്നാണ് കരുതുന്നതെന്ന് ഓക്സ്ഫോര്ഡ് വാക്സിന് വികസനത്തിന് പിന്നില് പ്രവര്ത്തിക്കുന്ന ശാസ്ത്രജ്ഞര് പ്രത്യാശ പ്രകടിപ്പിച്ചു.
എന്നാല്, വാക്സിന് പരീക്ഷണത്തില് നിന്ന് കുട്ടികളെ ഒഴിവാക്കുമെന്നും റിപോര്ട്ടില് പറയുന്നു. മുതിര്ന്ന ആളുകളിലേക്ക് ആറു മാസത്തിനുള്ളില് വാക്സിന് ലഭ്യമാകത്തക്ക വിധമുള്ള സംവിധാനം ക്രമീകരിക്കുമെന്നും ആരോഗ്യ വകുപ്പ് അധികൃതര് വ്യക്തമാക്കുന്നു. വാക്സിന്റെ അനുമതിയുമായി ബന്ധപ്പെട്ട പ്രക്രിയകള് വേഗത്തിലാക്കാന്നതിന്റെ ഭാഗമായി യൂറോപ്യന് മെഡിസിന്സ് ഏജന്സി ആസ്ട്രാസെനെക്ക, ഓക്സ്ഫോര്ഡ് സര്വകലാശാലയുടെ കൊവിഡ് വാക്സിന് എന്നിവ സംബന്ധിച്ച വിവരങ്ങള് അവലോകനം ചെയ്തു തുടങ്ങിയിട്ടുണ്ട്. വാക്സിന് അനുമതി ലഭിക്കുന്ന പക്ഷം വിപണിയിലിറക്കാന് യൂറോപ്പില് അനുമതി ലഭിക്കുന്ന ആദ്യ വാക്സിനാകും ഇത്.
വാക്സിനേഷന് നല്കുന്നതിന് കൂടുതല് ആരോഗ്യപ്രവര്ത്തകരെ അനുവദിക്കുക, വാക്സിനേഷന് കേന്ദ്രങ്ങള് സ്ഥാപിക്കുക, സായുധ സേനയുടെ സഹായം സ്വീകരിക്കുക എന്നിവയാണ് സര്ക്കാര് പരിഗണനയിലുള്ള പദ്ധതികളില് ഉള്പ്പെടുന്നതെന്ന് ടൈംസ് റിപോര്ട്ട് പറയുന്നു.