കൊല്ലം: കടയ്ക്കല്‍ ചിതറ കോത്തലയില്‍ തബ് ലീഗിന് പോയയാള്‍ക്ക് കൊറോണയെന്ന് വ്യാജ പ്രചാരണം. ഇക്കഴിഞ്ഞ 22നു ചെന്നൈയില്‍ നിന്നെത്തിയ ഇദ്ദേഹം ഹോം ക്വാറന്റൈനില്‍ കഴിഞ്ഞുവരികയായിരുന്നു. എന്നാല്‍ പ്രദേശത്തുള്ള ചിലര്‍ സംഘടിച്ച് ഇദ്ദേഹത്തെ വീട്ടില്‍ നിന്ന് മാറ്റണമെന്ന് ആവശ്യം ഉന്നയിച്ചു. ഇതേത്തുടര്‍ന്ന് ഹോം ക്വാറന്റൈനില്‍ കഴിഞ്ഞിരുന്ന ഇദ്ദേഹത്തെ ഇവിടെ നിന്നു മാറ്റി. കൊട്ടാരക്കരയില്‍ നിന്ന് ആംബുലന്‍സെത്തി ആശുപത്രിയിലേക്ക് മാറ്റുകയായിരുന്നു. നിലവില്‍ രോഗ ലക്ഷണങ്ങള്‍ ഒന്നും പ്രകടിപ്പിക്കുന്നില്ല. പ്രദേശത്തെ വാട്‌സാപ്പ് ഗ്രൂപ്പുകളിലും ഫേയ്‌സ്ബുക്കിലും വ്യാപകമായി വ്യാജ പ്രചാരണമാണ് നടക്കുന്നത്. വ്യാജ പ്രചരാണത്തിനെതിരെ കര്‍ശന നടപടി സ്വീകരിക്കുമെന്ന് കടയ്ക്കല്‍ സിഐ രാജേഷ് പറഞ്ഞു.