ആരാണയാൾ, കോൺഗ്രസുകാരനാണോ?; ഉമർ ഖാലിദിനെ തള്ളിപ്പറഞ്ഞ് കനയ്യകുമാർ

പട്ന: ജെഎൻയു കാലത്തെ സഹപാഠി ഉമർ ഖാലിദിനെ കോൺഗ്രസ് നേതാവ് കനയ്യകുമാർ തള്ളിപ്പറയുന്നതിന്റെ വീഡിയോ വൈറലാകുന്നു. ബിഹാറിലെ പൊതു പരിപാടിയിൽ പങ്കെടുത്ത ശേഷം മാധ്യമങ്ങളോട് സംസാരിക്കവെയായിരുന്നു കനയ്യയുടെ പ്രതികരണം.

ഉമർ ഖാലിദിനെക്കുറിച്ച് ചോദിച്ചപ്പോൾ അദ്ദേഹം കോൺഗ്രസുകാരനാണോ എന്നായിരുന്നു കനയ്യയുടെ മറുചോദ്യം. അല്ലെന്ന് മാധ്യമ പ്രവർത്തകൻ മറുപടി നൽകി. കോൺഗ്രസുകാരനല്ലാത്ത ഒരാളെക്കുറിച്ച് ചോദിച്ചിട്ട് എന്താണ് കാര്യമെന്ന് കനയ്യ ചോദിച്ചു. ഉമർ ഖാലിദ് താങ്കളുടെ സുഹൃത്തല്ലേ എന്ന ചോദ്യത്തോട് പരുഷമായാണ് കനയ്യ പ്രതികരിച്ചത്. ആരാണ് അത് പറഞ്ഞതെന്ന് കനയ്യ ചോദിച്ചു.

സ്വതന്ത്ര മാധ്യമ പ്രവർത്തകനായ അഷ്റഫ് ഹുസൈനാണ് വിവാദ വീഡിയോ ട്വീറ്റ് ചെയ്തിരിക്കുന്നത്. കനത്ത പ്രതിഷേധമാണ് കനയ്യക്കെതിരേ ഉയരുന്നത്. ജെഎൻയു കാലത്തെ ഇരുവരുടേയും ഫോട്ടോ റീട്വീറ്റ് ചെയ്തുകൊണ്ടാണ് ആളുകൾ പ്രതികരിക്കുന്നത്. നിലവിൽ ഡൽഹിയിലെ പൗരത്വ പ്രക്ഷോഭവുമായി ബന്ധപ്പെട്ട് ജയിലിൽ കഴിയുകയാണ് ഉമർ ഖാലിദ്.

2016ൽ ജെഎൻയു സമരകാലത്ത് കനയ്യകുമാറിനേയും ഉമർ ഖാലിദിനേയും പോലിസ് അറസ്റ്റ് ചെയ്തിരുന്നു. ജെഎൻയുവിൽ സംഘടിപ്പിച്ച അഫ്സൽ ഗുരു അനുസ്മരണ യോഗത്തിൽ രാജ്യവിരുദ്ധ മുദ്രാവാക്യം വിളിച്ചെന്ന് ആരോപിച്ചായിരുന്നു അറസ്റ്റ്. അന്ന് എഐഎസ്എഫ് നേതാവായിരുന്നു കനയ്യകുമാർ. ഈ വർഷമാണ് സിപിഐ വിട്ട് അദ്ദേഹം കോൺഗ്രസിലേക്ക് ചേക്കേറിയത്.