സാങ്കേതിക തകരാറിനെതുടര്ന്ന് ചന്ദ്രയാന് 2 വിക്ഷേപണം മാറ്റിവച്ചു; പുതിയ തിയ്യതി പിന്നീട്
വിക്ഷേപണവാഹനമായ ജിഎസ്എല്വിയില് ചില സാങ്കേതിക തകരാറുകള് കണ്ടെത്തിയതിനെ തുടര്ന്നാണ് വിക്ഷേപണം മാറ്റിയത്.
ശ്രീഹരിക്കോട്ട: രാജ്യം കാത്തിരുന്ന ചന്ദ്രയാന് 2ന്റെ വിക്ഷേപണം മാറ്റിവച്ചു. വിക്ഷേപണത്തിന് 56 മിനുട്ട് മാത്രം ശേഷിക്കെയാണ് സാങ്കേതികത്തകരാര് മൂലം കൗണ്ട്ഡൗണ് നിര്ത്തിവച്ച് വിക്ഷേപണം മാറ്റിവച്ചതായി ഐഎസ്ആര്ഒ വൃത്തങ്ങള് അറിയിച്ചത്. പുതുക്കിയ തീയതി പിന്നീട് അറിയിക്കുമെന്നും മിഷന് ഡയറക്ടര് അറിയിച്ചു.
ക്രയോജനിക് ഘട്ടത്തില് ഇന്ധനം നിറയക്കുന്നതുള്പ്പെടെയുള്ള പ്രക്രിയകള് പൂര്ത്തിയായതായിരുന്നു. തിങ്കളാഴ്ച പുലര്ച്ചെ 2.51ന് ശ്രീഹരിക്കോട്ടയിലെ സതീഷ് ധവാന് ബഹിരാകാശ കേന്ദ്രത്തില്നിന്ന് ചന്ദ്രയാന്2 വിക്ഷേപിക്കുമെന്നായിരുന്നു നേരത്തെ അറിയിച്ചിരുന്നത്.
ഞായറാഴ്ച പുലര്ച്ചെ 6.51ന് 20 മണിക്കൂര് നീണ്ട കൗണ്ട് ഡൗണ് തുടങ്ങിയിരുന്നു. രാഷ്ട്രപതി രാംനാഥ് കോവിന്ദുള്പ്പെടെയുള്ളവര് വിക്ഷേപണത്തിന് സാക്ഷ്യം വഹിക്കാനെത്തിയിരുന്നു. വിക്ഷേപണവാഹനമായ ജിഎസ്എല്വിയില് ചില സാങ്കേതിക തകരാറുകള് കണ്ടെത്തിയതിനെ തുടര്ന്നാണ് വിക്ഷേപണം മാറ്റിയത്.
ചന്ദ്രയാന് പേടകത്തിന് സാങ്കേതികപ്രശ്നങ്ങള് ഇല്ല. ജിഎസ്എല്വിയിലെ തകരാര് കൂടുതല് പ്രശ്നങ്ങളിലേക്ക് നയിക്കാതിരിക്കാനാണ് വിക്ഷേപണം മാറ്റിയതെന്നാണ് പ്രാഥമിക നിഗമനം.ജിഎസ്എല്വി മാര്ക്ക്3 വിക്ഷേപണ റോക്കറ്റില് നിന്നാണ് ചന്ദ്രയാന്2 വിക്ഷേപിക്കാനിരുന്നത്.
ലോകത്ത് ഇതേവരെയുണ്ടായ ഏറ്റവും ചിലവ് കുറഞ്ഞ ചാന്ദ്രദൗത്യമാണ് ഇന്ത്യയുടെ ചന്ദ്രയാന് 2 വിക്ഷേപണം. 978 കോടി രൂപയാണ് ദൗത്യത്തിന്റെ ആകെ ചിലവ്. ഇതില് 603 കോടി രൂപ ചന്ദ്രയാന് രണ്ടിന്റെയും 375 കോടി രൂപ ജിഎസ്എല്വി വിക്ഷേപണവാഹനത്തിന്റെയും ചിലവാണ്. മിക്ക ഹോളിവുഡ് സയന്സ് ഫിക്ഷന്, ആക്ഷന് ത്രില്ലര് സിനിമകളെക്കാള് കുറഞ്ഞ ചെലവാണ് ചന്ദ്രയാന് ദൗത്യത്തിന്റേതെന്ന് ചുരുക്കം.
ചന്ദ്രനെ വലം വയ്ക്കാനുള്ള ഓര്ബിറ്റര്, ചന്ദ്രനില് ഇറങ്ങുന്ന വിക്രം ലാന്ഡര്, ചന്ദ്ര പര്യവേഷണത്തിനായി തയ്യാറാക്കിയ പ്രഗ്യാന് റോവര് എന്നിങ്ങനെ മൂന്ന് ഘടകങ്ങള് അടങ്ങിയതാണ് ചന്ദ്രയാന് രണ്ട്. ഇന്ന് വരെ ഒരു പര്യവേഷണ വാഹനവും കടന്ന് ചെല്ലാത്ത ചന്ദ്രന്റെ ദക്ഷിണധ്രുവത്തിലാണ് ചന്ദ്രയാന് രണ്ടിന്റെ വിക്രം ലാന്ഡര് ലക്ഷ്യം വച്ചിരുന്നത്. സെപ്റ്റംബര് ഏഴിനു പുലര്ച്ചെ ചന്ദ്രയാന്2 ചന്ദ്രോപരിതലത്തില് ഇറങ്ങുമെന്നായിരുന്നു പ്രതീക്ഷിച്ചിരുന്നത്.