പിലാത്തറയില് കോണ്ഗ്രസ് ബൂത്ത് ഏജന്റിന്റെ വീടിന് നേരെ ബോംബേറ്
കോണ്ഗ്രസ് ബൂത്ത് ഏജന്റായിരുന്ന പിലാത്തറ പുത്തൂരിലെ വി ടി വി പത്മനാഭന്റെ വീടിന് നേരെയാണ് ഇന്നലെ രാത്രി 12 ഓടെ ബോംബേറുണ്ടായത്.
കണ്ണൂര്: കള്ളവോട്ടിന്റെ പശ്ചാത്തലത്തില് റീപോളിങ് നടന്ന കണ്ണൂരിലെ പിലാത്തറയില് കോണ്ഗ്രസ് ബൂത്ത് ഏജന്റിന്റെ വീടിന് നേരെ ബോംബേറ്. കോണ്ഗ്രസ് ബൂത്ത് ഏജന്റായിരുന്ന പിലാത്തറ പുത്തൂരിലെ വി ടി വി പത്മനാഭന്റെ വീടിന് നേരെയാണ് ഇന്നലെ രാത്രി 12 ഓടെ ബോംബേറുണ്ടായത്.
ബോംബേറില് വീടിന്റെ ജനല്ച്ചില്ലുകള് തകരുകയും ചുവരുകള്ക്ക് കേടുപാട് സംഭവിക്കുകയും ചെയ്തു.ശബ്ദം കേട്ട് വീട്ടുകാര് വരുമ്പോഴേക്കും അക്രമികള് രക്ഷപ്പെട്ടിരുന്നു. കാസര്കോട് ലോക്സഭാ മണ്ഡലം പരിധിയില് വരുന്ന കല്യാശേരി നിയമസഭാ മണ്ഡലത്തിലെ പിലാത്തറ യുപി സ്കൂള് 19ാം ബൂത്തിലെ കോണ്ഗ്രസ് ഏജന്റായിരുന്നു പത്മനാഭന്.
ഇന്നലെയായിരുന്നു പിലാത്തറയിലടക്കം കണ്ണൂര്, കാസര്കോട് മണ്ഡലങ്ങളിലെ ഏഴ് ബൂത്തുകളില് റീപോളിങ് നടന്നത്. പോളിങ് സമാധാനപരമായി കഴിഞ്ഞതിന് പിന്നാലെ അര്ധരാത്രിയോടെ നടത്തിയ അക്രമം ആസൂത്രിതമാണെന്നും പരാജയഭീതിയിലാണ് സിപിഎം അക്രമം അഴിച്ചുവിടുന്നതെന്നും കോണ്ഗ്രസ് ആരോപിച്ചു.