കിഴക്കമ്പലത്ത് പോലിസിനെ അക്രമിച്ചത് കിറ്റക്സിലെ തൊഴിലാളികള്; ഒരു പോലിസ് ജീപ്പ് കത്തിച്ചു, ഒരു വാഹനം അടിച്ചുതകര്ത്തു
കൊച്ചി: കിഴക്കമ്പലത്ത് പോലിസിന് നേരെ ആക്രമണം നടത്തിയത് കിറ്റക്സിലെ തൊഴിലാളികള്. രാത്രി 12 മണിയോടെ തൊഴിലാളികള് താമസിക്കുന്ന ക്യാംപിലുണ്ടായ സംഘര്ഷം പോലിസിനു നേരെയും നാട്ടുകാര്ക്കു നേരെയും തിരിയുകയായിരുന്നു. തൊഴിലാളികള് ഒരു പോലിസ് ജീപ്പ് കത്തിക്കുകയും പ്രദേശവാസികളും പോലിസും ഉള്പ്പടെ നിരവധി പേരെ ആക്രമിക്കുകയും ചെയ്തു. കൂടുതല് പോലിസ് എത്തിയാണ് അക്രമികളെ അറസ്റ്റ് ചെയ്ത് നീക്കിയത്.
കിഴക്കമ്പലം കിറ്റക്സിലെ തൊഴിലാളികള് താമസിക്കുന്ന ക്യാമ്പിലാണ് സംഭവമുണ്ടായത്. ക്രിസ്മസുമായി ബന്ധപ്പെട്ട ആഘോഷത്തിനിടെ തൊഴിലാളികള്ക്കിടയില് ഏറ്റുമുട്ടല് ഉണ്ടാകുകയായിരുന്നു. പോലിസ് കണ്ട്രോള് റൂമില് ലഭിച്ച വിവരമനുസരിച്ച് സംഭവം അന്വേഷിക്കാനെത്തിയ പോലീസ് ഉദ്യോഗസ്ഥര്ക്ക് നേരെയും തൊഴിലാളികള് ആക്രമണം അഴിച്ചുവിടുകയായിരുന്നു.
പോലിസ് എത്തിയ ജീപ്പ് നൂറോളം വരുന്ന തൊഴിലാളികള് ചേര്ന്ന് അടിച്ചു തകര്ത്തു. പോലിസുകാര്ക്ക് ക്രൂരമായ മര്ദനമേറ്റു. തുടര്ന്ന് സംഭവം അന്വേഷിക്കാനെത്തിയ കുന്നത്തുനാട് പോലിസ് സ്റ്റേഷനിലെ ജീപ്പ് തൊഴിലാളികള് അഗ്നിക്കിരയാക്കി. പോലിസുകാര് ജീപ്പില് നിന്ന് ഇറങ്ങി ഓടി രക്ഷപ്പെട്ടു. വാഹനം പൂര്ണമായും കത്തിനശിച്ചു. കുന്നത്തുനാട് സി.ഐയ്ക്ക് അടക്കം ഗുരുതരമായി പരിക്കേറ്റു. എ.എസ്.ഐ ഉള്പ്പെടെ നാല് പോലിസുകാര്ക്കും പരിക്കേറ്റു.
മദ്യപിച്ച് പരസ്പരം ഉണ്ടായ തര്ക്കമാണ് പ്രശ്നത്തിന് തുടക്കമെന്ന് പോലിസ് പറഞ്ഞു. അക്രമത്തിന്റെ ദൃശ്യങ്ങള് മൊബൈലില് പകര്ത്താന് ശ്രമിച്ചവരെ പോലും ഇവര് മര്ദിച്ചു. സ്ഥലത്തെത്തിയ നാട്ടുകാര്ക്കുനേരെ തൊഴിലാളികള് കല്ലെറിയുകയും ചെയ്തു. തുടര്ന്ന് ആലുവ റൂറല് എസ്.പി കാര്ത്തിക്കിന്റെ നേതൃത്വത്തില് 500 ഓളം പോലിസുകാര് സ്ഥലത്തെത്തി. ഇവര് ഹോസ്റ്റലിനുള്ളിലേക്ക് കയറി ബലം പ്രയോഗിച്ച് തൊഴിലാളികളെ പിടികൂകയായിരുന്നു.