ആലപ്പുഴ: ലോക്കല് സെക്രട്ടറിയുടെ എസ്ഡിപിഐ ബന്ധത്തെച്ചൊല്ലി ആലപ്പുഴ സിപിഎമ്മില് കൂട്ടരാജി. ചെറിയനാട് സൗത്ത് ലോക്കല് കമ്മിറ്റിയിലെ 38 പാര്ട്ടി അംഗങ്ങളാണ് കൂട്ടത്തോടെ രാജിവച്ചത്. നാല് ബ്രാഞ്ച് സെക്രട്ടറിമാര് ഉള്പ്പെടെയുള്ളവരാണ് രാജി സമര്പ്പിച്ചിരിക്കുന്നത്. വര്ഗ ബഹുജന സംഘടനകളുടെ ഭാരവാഹികളും കൂട്ടത്തോടെ പാര്ട്ടി വിട്ടു. രാജിവച്ചവര് സംസ്ഥാന നേതൃത്വത്തിന് പരാതി നല്കിയിട്ടുണ്ട്. ഇന്ന് ജില്ലാ സെക്രട്ടേറിയറ്റ് ചേരാനിരിക്കേയാണ് പാര്ട്ടി നേതൃത്വത്തെ ഞെട്ടിച്ച് വീണ്ടും കൂട്ടരാജി.
തങ്ങളെ ഒഴിവാക്കണമെന്നാവശ്യപ്പെട്ട് ജില്ലാ സെക്രട്ടറി ആര് നാസറിന് നേരിട്ടെത്തിയാണ് പാര്ട്ടി അംഗങ്ങള് രാജിക്കത്ത് സമര്പ്പിച്ചത്. ലോക്കല് സെക്രട്ടറി ഷീദ് മുഹമ്മദ് എസ്ഡിപിഐക്കാരനുമായി അടുത്ത ബന്ധമുള്ളയാളാണെന്നും ഇയാള് പാര്ട്ടിയുടെ അച്ചടക്കവുമായി ബന്ധപ്പെട്ട് മുന്നോട്ടുപോവാന് കഴിയാത്ത ആളാണെന്നും പ്രവര്ത്തകര് ജില്ലാ സെക്രട്ടറിക്ക് നല്കിയ കത്തില് പറയുന്നു. ചെങ്ങന്നൂര് ഏരിയാ കമ്മിറ്റിക്ക് കീഴിലാണ് ചെറിയനാട് സൗത്ത് ലോക്കല് കമ്മിറ്റി.
ലോക്കല് കമ്മിറ്റി സെക്രട്ടറിയുടെ ബിസിനസ് പങ്കാളി എസ്ഡിപിഐ നേതാവാണ് എന്നതിന് പുറമേ, ലോക്കല് കമ്മിറ്റി സെക്രട്ടറിയുടെ സ്വന്തം വാര്ഡില് പോലും എസ്ഡിപിഐയാണ് വിജയിച്ചതെന്ന ആരോപണവും രാജിവച്ചവര് ഉന്നയിക്കുന്നു. സംസ്ഥാന കമ്മിറ്റി ആഹ്വാനം ചെയ്ത വര്ഗീയ വിരുദ്ധ സദസ്സുകളൊന്നും ലോക്കല് സെക്രട്ടറി നടത്തിയില്ല. ഇത് പാര്ട്ടി പരിശോധിക്കണമെന്ന് നേരത്തെ തന്നെ ആവശ്യപ്പെട്ടിരുന്നു. ഇതില് നടപടിയുണ്ടാവാത്ത പശ്ചാത്തലത്തില് കൂടിയാണ് രാജിയെന്ന് നേതൃത്വത്തിന് നല്കിയ കത്തില് വ്യക്തമാക്കുന്നു.