മെസി കേരളത്തില് വരാത്തതിന്റെ ഉത്തരവാദിത്തം സ്പോണ്സര്ക്ക്'; റിപോര്ട്ടര് ബ്രോഡ്കാസ്റ്റിങ് കമ്പനിക്കെതിരേ കായികമന്ത്രി
തിരുവനന്തപുരം: അര്ജന്റീന ഫുട്ബോള് ടീമും നായകന് ലയണല് മെസിയും കേരളത്തില് വരാത്തതിന്റെ പൂര്ണ ഉത്തരവാദിത്തം സ്പോണ്സര്ക്കെന്ന് കായികമന്ത്രി വി അബ്ദുറഹിമാന്. മെസിയെ കൊണ്ടുവരുന്നത് സര്ക്കാരല്ലെന്നും സ്പോണ്സറായ റിപോര്ട്ടര് ബ്രോഡ്കാസ്റ്റിങ് കമ്പനിക്കെതിരെ നടപടിയുണ്ടാകുമെന്നും മന്ത്രി പറഞ്ഞു. റിപോര്ട്ടര് ടിവിയുടെ എംഡിയാണ് മെസിയെ കൊണ്ടുവരുമെന്ന് പറഞ്ഞതെന്നും വരുന്ന വാര്ത്തകളെക്കുറിച്ച് തനിക്ക് കൂടുതലായി അറിയില്ലെന്നും മന്ത്രി പറഞ്ഞു.
ഇത്രയും തുക മുടക്കി അര്ജന്റീന ടീമിനെ കൊണ്ടുവരാന് സര്ക്കാരിനാകില്ലെന്നും കരാറുണ്ടാക്കിയത് റിപോര്ട്ടര് ബ്രോഡ്കാസ്റ്റിങ് കമ്പനിയുമായിട്ടാണെന്നും മന്ത്രി അബ്ദുറഹിമാന് പറഞ്ഞു. സര്ക്കാരിന്റെ കയ്യില് ഇത്രയധികം പണമില്ല. സ്പോണ്സര്ഷിപ് അവരുടെ അഭ്യര്ത്ഥനപ്രകാരം അവര് കൊടുത്തതാണ്. അവരാണ് തീരുമാനിക്കേണ്ടത്. കേരള സന്ദര്ശനവുമായി ബന്ധപ്പെട്ട വിഷയത്തില് ഇതുവരെ സ്പോണ്സര് തന്നോട് ഔദ്യോഗികമായി ഒന്നും വിശദീകരിച്ചിട്ടില്ലെന്നും മന്ത്രി കൂട്ടിച്ചേര്ത്തു.