റൊണാള്ഡോ ഇന്ത്യയിലേക്ക്; എഎഫ്സി ചാംപ്യന്സ് ലീഗില് എഫ്സി ഗോവയും അല് നസറും ഒരേ ഗ്രൂപ്പില്
റിയാദ്: പോര്ച്ചുഗീസ് സൂപ്പര് താരം ക്രിസ്റ്റ്യാനോ റൊണാള്ഡോ ഇന്ത്യയിലേക്കെത്തിയേക്കും. എഎഫ്സി ചാംപ്യന്സ് ലീഗ് ഫുട്ബോളില് കളിക്കാനാണ് റൊണാള്ഡോ ഇന്ത്യയിലെത്തുക. വെള്ളിയാഴ്ച മലേഷ്യയിലെ ക്വലാലംപുരില് എഎഫ്സി ചാംപ്യന്സ് ലീഗ് ഗ്രൂപ്പ് രണ്ട് നറുക്കെടുപ്പില് റൊണാള്ഡോയുടെ ക്ലബ്ബായ സൗദിയിലെ അല് നസറും എഫ്സി ഗോവയും ഒരേ ഗ്രൂപ്പില് ഉള്പ്പെട്ടതോടെയാണിത്.
ഹോം ആന്ഡ് എവേ അടിസ്ഥാനത്തിലാണ് ടൂര്ണമെന്റിലെ മത്സരങ്ങള്. അതിനാല് തന്നെ എഫ്സി ഗോവയ്ക്കെതിരേ ഇന്ത്യയില് കളിക്കാന് റൊണാള്ഡോ എത്തിയേക്കുമെന്നാണ് റിപോര്ട്ടുകള് പറയുന്നത്. സെപ്റ്റംബര് 16 മുതല് ഡിസംബര് 10 വരെയാണ് മല്സരങ്ങള് നിശ്ചയിച്ചിട്ടുള്ളത്.
ചാംപ്യന്സ് ലീഗിന്റെ പശ്ചിമമേഖലയിലെ 16 ടീമുകളെയാണ് നാലുഗ്രൂപ്പുകളായി തിരിക്കുന്നത്. ഇതില് പോട്ട് ഒന്നിലായിരുന്നു സൗദി ക്ലബ്ബ് അല് നസര് പോട്ട് മൂന്നില് ബഗാനും നാലില് ഗോവയും. വെള്ളിയാഴ്ച നടന്ന നറുക്കെടുപ്പില് അല് നസറും എഫ്സി ഗോവയും ഒരു ഗ്രൂപ്പില് ഉള്പ്പെടുകയായിരുന്നു.