ബാഴ്സലോണ: കറ്റലന് ആരാധകര്ക്ക് വമ്പന് സര്പ്രൈസ് നല്കി, തനിക്ക് എല്ലാമെല്ലാമായ ബാഴ്സലോണയുടെ ക്യാംപ് നൗ സ്റ്റേഡിയത്തിലേക്ക് തിരിച്ചെത്തി ലയണല് മെസി. 2021-ല് ഹൃദയ വേദനയോടെ ബാഴ്സ വിട്ട മെസി ഇതാദ്യമായാണ് ക്ലബ്ബിന്റെ സ്റ്റേഡിയത്തിലേക്കെത്തുന്നത്. ഞായറാഴ്ച രാത്രിയായിരുന്നു മെസ്സിയുടെ രഹസ്യ സന്ദര്ശനം. തിങ്കളാഴ്ച മെസി തന്നെയാണ് ഇതിന്റെ ചിത്രങ്ങള് ഇന്സ്റ്റാഗ്രാമില് പങ്കുവച്ചത്.
എംഎല്എസ് പ്ലേഓഫില് നാഷ്വില്ലെയ്ക്കെതിരായ മല്സരത്തിലെ തകര്പ്പന് വിജയത്തിനു പിന്നാലെയാണ് മെസി ബാഴ്സയിലേക്ക് വിമാനം കയറിയത്. നവീകരിച്ച ക്യാംപ് നൗ സ്റ്റേഡിയത്തിലെ പുല്ത്തകിടിയില് ഒരിക്കല് കൂടി നല്ക്കുന്ന ചിത്രങ്ങളാണ് മെസി പങ്കുവച്ചത്. ബാഴ്സലോണയിലേക്കുള്ള തന്റെ വൈകാരികമായ തിരിച്ചുവരവിനു ശേഷം ക്ലബ്ബുമായും ആരാധകരുമായും ഇപ്പോഴും തനിക്കുള്ള ആഴത്തിലുള്ള ബന്ധം സൂചിപ്പിക്കുന്ന ഒരു കുറിപ്പും മെസി പങ്കിട്ടു.
'എന്റെ ആത്മാവും ഹൃദയവും തുടിക്കുന്ന മണ്ണിലേക്ക് ഞാന് തിരിച്ചെത്തി. ഞാന് വളരെയധികം സന്തോഷിച്ച ഇടം. ലോകത്തിലെ ഏറ്റവും സന്തോഷവാനായ വ്യക്തിയാണെന്ന് ആയിരം മടങ്ങ് തോന്നിപ്പിച്ച ഇടം. ഒരു കളിക്കാരന് എന്ന നിലയില് യാത്രപറയാന് കൂടി ഒരു ദിവസം തിരിച്ചുവരാന് കഴിയുമെന്ന് പ്രതീക്ഷിക്കുന്നു', മെസി കുറിച്ചു.
ക്ലബ്ബിന്റെ കടുത്ത സാമ്പത്തിക പ്രതിസന്ധിയെ തുടര്ന്ന് 2021-ലാണ് മെസിക്ക് ബാഴ്സ വിടേണ്ടിവന്നത്. ബാഴ്സയ്ക്കൊപ്പം രണ്ടു പതിറ്റാണ്ടോളം നീണ്ടുനിന്ന ബന്ധമായിരുന്നു മെസിയുടേത്.ബാഴ്സലോണയുടെ നിലവിലെ പ്രസിഡന്റ് ജോണ് ലാപോര്ട്ട വളരെക്കാലമായി മെസ്സിക്ക് അര്ഹമായ വിടവാങ്ങല് നല്കണമെന്ന ആഗ്രഹം പങ്കുവെയ്ക്കുന്നുണ്ട്. ക്യാംപ് നൗ പൂര്ണമായും മല്സരത്തിന് സജ്ജമായാല് മെസിക്കായി ഇവിടെ ഒരു വിടവാങ്ങല് മല്സരം നടക്കാനും സാധ്യതയുണ്ട്.