പനാജി: ഇന്ത്യന്‍ സൂപ്പര്‍ ലീഗില്‍ നോര്‍ത്ത് ഈസ്റ്റ് യുനൈറ്റഡിനെതിരേ ഒരു ഗോളിന്റെ ജയവുമായി ഒഡീഷാ എഫ് സി. മല്‍സരത്തില്‍ കൂടുതല്‍ ആധിപത്യം പുലര്‍ത്തിയതും മികച്ച അവസരങ്ങള്‍ സൃഷ്ടിച്ചതും നോര്‍ത്ത് ഈസ്റ്റ് യുനൈറ്റഡ് എഫ് സി ആയിരുന്നു. എന്നാല്‍ ഭാഗ്യം ഇന്ന് അവരെ തുണച്ചില്ല. ഭാഗ്യം ഒഡീഷയ്‌ക്കൊപ്പമായിരുന്നു. ജയത്തോടെ അവര്‍ ലീഗില്‍ രണ്ടാം സ്ഥാനത്തെത്തി. ഒഡീഷയ്ക്ക് വേണ്ടി 81ാം മിനിറ്റില്‍ ബ്രസീലിയന്‍ ഫോര്‍വേഡ് ജൊനാതാസ് ക്രിസ്റ്റിയനാണ് വിജയഗോള്‍ നേടിയത്. തൊയ്ബ സിങ് നല്‍കിയ ക്രോസാണ് ഗോളിന് വഴിയൊരുക്കിയത്. മികച്ച ഹെഡററിലൂടെ ഒഡീഷയുടെ വിജയഗോള്‍ ജൊനാതാസ് നേടി. തോല്‍വിയോടെ നോര്‍ത്ത് ഈസ്റ്റ് ലീഗില്‍ ഒമ്പതാം സ്ഥാനത്തേക്ക് വീണു.