ഓള്ഡ് ട്രാഫോഡ്: ഇംഗ്ലിഷ് പ്രീമിയര് ലീഗില് അപരാജിത വിജയകുതിപ്പ് നടത്തിയ ലിവര്പൂളിനെ മാഞ്ചസ്റ്റര് യുനൈറ്റഡ് പിടിച്ചുകെട്ടി. ഇന്ന് നടന്ന മല്സരത്തില് 1-1നായിരുന്നു ലിവര്പൂളിന്റെ സമനില. മോശം ഫോമിലായിരുന്ന യുനൈറ്റഡ് ഇന്ന് മികച്ച തുടക്കമാണ് നല്കിയത്. മാര്ക്കസ് റാഷ്ഫോഡിലൂടെ 36ാം മിനിറ്റില് അവര് മുന്നിലെത്തി. ഡാനിയല് ജെയിംസ് നല്കിയ പാസ് റാഷ്ഫോഡ് ഗോളാക്കി മാറ്റുകയായിരുന്നു. ആദ്യപകുതിയില് ഞെട്ടിയ ലിവര്പൂള് രണ്ടാം പകുതിയില് ആക്രമണം അഴിച്ചുവിട്ടു. തുടര്ന്ന് 85ാം മിനിറ്റില് ആഡം ലലാന്നയിലൂടെ ലിവര്പൂള് തിരിച്ചടിച്ചു. എന്നാല് വിജയിക്കാനുള്ള ഒരു ഗോളിനായി ലിവര്പൂള് കിടഞ്ഞ് പരിശ്രമിച്ചിട്ടും വിഫലമാവുകയായിരുന്നു. ലീഗില് യുനൈറ്റഡ് 13ാം സ്ഥാനത്തും ലിവര്പൂള് ഒന്നാം സ്ഥാനത്തുമാണ്. ലിവര്പൂള് നിരയില് മുഹമ്മദ് സലായും യുനൈറ്റഡ് നിരയില് പോഗ്ബെയുമില്ലാതെയാണ് ക്ലബ്ബുകള് ഇന്നിറങ്ങിയത്. തുടര്ച്ചയായ 17 ജയങ്ങള് എന്ന ലിവര്പൂളിന്റെ കുതിപ്പാണ് യുനൈറ്റഡ് അവസാനിപ്പിച്ചത്.