ക്ലബ്ബ് ലോകകപ്പ്; ജാവോ പെഡ്രോയ്ക്ക് ഡബിള്; ഫ്ലൂമിനെന്സിനെ വീഴ്ത്തി ചെല്സി ഫൈനലില്; ഇന്ന് പിഎസ്ജി-റയല് സെമി
ഫ്ളോറിഡ: ഫിഫ ക്ലബ് ലോകകപ്പ് ഫുട്ബോള് ടൂര്ണമെന്റില് ഇംഗ്ലീഷ് ക്ലബ് ചെല്സി ഫൈനലില്. ബ്രസീല് ഫുട്ബോള് ക്ലബ്ബ് ഫ്ലൂമിനെന്സിനെ എതിരില്ലാത്ത രണ്ട് ഗോളുകള്ക്ക് തകര്ത്താണ് ചെല്സിയുടെ വിജയം. ബ്രസീലിയന് താരം ജാവൊ പെഡ്രോ ചെല്സിക്കായി ഇരട്ട ഗോള് നേടി. ഇന്ന് രാത്രി നടക്കുന്ന രണ്ടാം സെമിയില് സ്പാനിഷ് ക്ലബ് റയല് മാഡ്രിഡും ഫ്രഞ്ച് ക്ലബ് പി എസ് ജിയും തമ്മില് ഏറ്റുമുട്ടും. ഇതിലെ വിജയികള് ഫൈനലില് ചെല്സിയെ നേരിടും.
മല്സരത്തിന്റെ 18-ാം മിനിറ്റില് പെഡ്രോ ചെല്സിക്ക് ലീഡ് സമ്മാനിച്ചു. ബോക്സിന് പുറത്തായി ലഭിച്ച പാസ് സ്വീകരിച്ച പെഡ്രോ പന്തുമായി മുന്നേറി. പിന്നാലെ ഒരു തകര്പ്പന് വലംകാല് ഷോട്ടിലൂടെ താരം പന്ത് വലയിലാക്കി. രണ്ടാം പകുതിയില് 56-ാം മിനിറ്റില് പെഡ്രോ വീണ്ടും ലക്ഷ്യം കണ്ടു. സഹതാരം പെഡ്രോ നെറ്റോയുടെ ഷോട്ട് ഫ്ലൂമിനന്സ് പ്രതിരോധ താരത്തിന്റെ കാലുകളില് നിന്ന് തിരികെ ജാവൊ പെഡ്രോയിലേക്കെത്തി. വീണ്ടുമൊരു കിടിലന് ഷോട്ടിലൂടെ പെഡ്രോ പന്ത് വലയിലാക്കി.
ക്ലബ്ബ് ലോകകപ്പില് ആദ്യ മല്സരത്തില് ലോസ് എയ്ഞ്ചല്സിനെ വീഴ്ത്തിയാണ് ചെല്സി യാത്ര തുടങ്ങിയത്. എന്നാല് രണ്ടാം മല്സരത്തില് ബ്രസീലിയന് ക്ലബ്ബ് ഫ്ലമെന്ഗോയോട് പരാജയപ്പെട്ടു. എങ്കിലും അവസാന മല്സരത്തില് ഇ എസ് ടുനീസിനെ വീഴ്ത്തി ചെല്സി ക്വാര്ട്ടറിലേക്ക് മുന്നേറി. പ്രീക്വാര്ട്ടറില് ബെന്ഫീക്കയെ വീഴ്ത്തിയ മുന്ചാംപ്യന്മാര് ക്വാര്ട്ടറില് പാമിറാസിനെയും തോല്പ്പിച്ച് സെമിയിലേക്ക് മുന്നേറുകയായിരുന്നു.