റോം: ഇറ്റാലിയന് ഇതിഹാസം ഫ്രാന്സിസ്കോ ടോട്ടിയുടെ മകന് ക്രിസ്റ്റ്യന് ടോട്ടി 19ാം വയസ്സില് ഫുട്ബാളില്നിന്ന് വിരമിച്ചു. തീരുമാനത്തിന് പ്രേരിപ്പിച്ചതെന്താണെന്ന് ക്രിസ്റ്റ്യന് ഔദ്യോഗികമായി വിശദീകരിച്ചിട്ടില്ലെങ്കിലും താരപുത്രനാണെന്ന മാനസിക സമ്മര്ദം താങ്ങാനാവാത്തതിനാലാണ് കളി മതിയാക്കുന്നതെന്ന് വിദേശ മാധ്യമങ്ങള് റിപോര്ട്ട് ചെയ്തു.
എ.എസ് റോമയിലൂടെ കരിയര് തുടങ്ങിയ ക്രിസ്റ്റ്യന് വേണ്ടത്ര അവസരങ്ങള് ലഭിക്കാത്തതിനാല് നാലാം ഡിവിഷനിലേക്ക് മാറി. ഫോര്വേഡായ താരം കുറഞ്ഞ കാലം സ്പാനിഷ് ക്ലബായ റയോ വയ്യേകാനോക്കു വേണ്ടിയും കളിച്ചിട്ടുണ്ട്. ബോഡി ഷെയിമിങ്ങിനും ക്രിസ്റ്റ്യന് ഇരയായിരുന്നതായി റിപോര്ട്ടുണ്ട്.
ഫ്രാന്സിസ്കോയുടെയും മോഡല് ഇലാരി ബ്ലാസിയുടെയും മകനായതിനാല് ക്രിസ്റ്റ്യനെ മോശം വസ്തുവിനെപ്പോലെ ചിലര് മാറ്റിനിര്ത്തിയെന്ന് താരം കളിച്ച ഇറ്റാലിയന് ക്ലബ്ബായ ഒല്ബിയയുടെ ടെക്നിക്കല് ഡയറക്ടര് നിന്നി കോര്ഡയും വെളിപ്പെടുത്തിയിരുന്നു. പിതാവ് സ്ഥാപിച്ച ടോട്ടി സോക്കര് സ്കൂളിനുവേണ്ടി പ്രവര്ത്തിക്കാനാണ് ക്രിസ്റ്റ്യന്റെ തീരുമാനം.