മയാമി: ഇന്റര് മയാമി താരം ലിയോണല് മെസിക്കെതിരെ നടപടിക്കൊരുങ്ങി മേജര് ലീഗ് സോക്കര്. ഓള് സ്റ്റാര് ടീമില് നിന്ന് അവസാന നിമിഷം പിന്മാറിയ മെസിയെയും സഹതാരം ജോര്ഡി ആല്ബയേയും ഒരുമല്സരത്തില് നിന്ന് വിലക്കാനാണ് നീക്കം. കൃത്യമായ കാരണമില്ലാതെ അവസാന നിമിഷം പിന്മാറിയ മെസിയുടെ തീരുമാനം അംഗീകരിക്കാന് കഴിയില്ലെന്നും എത്രവലിയ താരമാണെങ്കിലും ലീഗിലെ നിയമങ്ങള് പാലിക്കാന് ബാധ്യസ്ഥര് ആണെന്നും എം എല് എസ് കമ്മീഷണര് ഡോണ് ഗാര്ബര് പറഞ്ഞു.
മെസി മഹാനായ താരമാണെന്നും അദ്ദേഹത്തിനൊപ്പം കളിക്കുന്നതും പരിശീലിപ്പിക്കാന് അവസരം ലഭിക്കുന്നതും വലിയ നേട്ടമാണെന്നും പറഞ്ഞ ഓള് സ്റ്റാര് ഇലവന് പരിശീലകന് നിക്കോ എസ്റ്റേവെസ് എന്നാല് മല്സരത്തില് കളിക്കാനിറങ്ങാത്ത മെസിയുടെ നടപടി അംഗീകരിക്കാനാവില്ലെന്ന് വ്യക്തമാക്കി. മല്സരത്തില് കളിക്കാന് ഇറങ്ങിയ മറ്റ് താരങ്ങളെയും ബഹുമാനിക്കേണ്ടിയിരുന്നുവെന്നും നിക്കോ വ്യക്തമാക്കി.
വിലക്ക് വരികയാണെങ്കില് മെസിക്കും ആല്ബയ്ക്കും മേജര് ലീഗ് സോക്കറില് സിന്സിനാറ്റിക്കെതിരായ അടുത്ത മത്സരം നഷ്ടമാവും. ബുധനാഴ്ച നടന്ന മേജര് ലീഗ് സോക്കറിലെ ഓള് സ്റ്റാര് ഇലവനും മെക്സിക്കോയിലെ ലിഗ എംഎക്സും തമ്മിലുള്ള മല്സരത്തില് ഓള് സ്റ്റാര് ഇലവന് ഒന്നിനെതിരെ മൂന്ന് ഗോളുകള്ക്ക് ജയിച്ചിരുന്നു. സാം സറിഡ്ജും തായ് ബാരിബോയും ബ്രയാന് വൈറ്റുമാണ് എംഎല്എസ് ഓള് സ്റ്റാര് ഇലവനായി സ്കോര് ചെയ്തത്. ലിഗ എം എക്സിന്റെ സൂപ്പര് താരമായ മെക്സിക്കോ താരം ജെയിംസ് റോഡ്രിഗസും മല്സരത്തില് നിന്ന് വിട്ടുനിന്നിരുന്നു.
കഴിഞ്ഞ വര്ഷം പരിക്കുമൂലെ മെസിക്ക് ഓള് സ്റ്റാര് ഇലവനുവേണ്ടി കളിക്കാന് ഇറങ്ങാനായിരുന്നില്ല. മേജര് ലീഗ് സോക്കറില് 18 ഗോളുകളുമായി ഗോള് വേട്ടയില് നാഷ്വില്ലെ താരം സാം സറിഡ്ജിനൊപ്പം ഒന്നാം സ്ഥാനത്താണിപ്പോള് മെസി.