ലെജന്ഡ്സ് ക്രിക്കറ്റ് ചാംപ്യന്ഷിപ്പില് നിന്നും ഇന്ത്യന് ടീം പിന്മാറി; പാകിസ്താന് ഫൈനലില്
ന്യൂഡല്ഹി:ലെജന്ഡ്സ് ക്രിക്കറ്റ് ചാംപ്യന്ഷിപ്പില് നിന്നും ഇന്ത്യന് ടീം പിന്മാറി. പാകിസ്താനെതിരായ സെമിയില് നിന്നാണ് ഇന്ത്യയുടെ പിന്മാറ്റം. കളിക്കാനാകില്ലെന്ന് ഇന്ത്യന് താരങ്ങള് നിലപാട് എടുത്തതോടെയാണ് പിന്മാറ്റം. ഇന്ത്യ പിന്മാറിയതോടെ പാകിസ്താന് ഫൈനലിലെത്തി. ഏഷ്യ കപ്പില് കളിക്കാനുള്ള ബിസിസിഐ തീരുമാനം വിവാദമായിരിക്കെയാണ് പിന്മാറ്റം. ഗ്രൂപ്പ് മല്സരത്തിലും ഇന്ത്യ -പാകിസ്താന് മല്സരം ഉപേക്ഷിച്ചിരുന്നു.
ലോക ലെജന്ഡ്സ് ചാംപ്യന്ഷിപ്പിലെ അവസാന മല്സരത്തില് വിന്ഡീസിനെതിരെ തകര്പ്പന് ജയവുമായാണ് ഇന്ത്യ ചാംപ്യന്സ് സെമിയിലെത്തിയത്. ഗ്രൂപ്പ് ഘട്ടത്തിലെ അവസാന മല്സരത്തില് വിന്ഡീസ് ചാംപ്യന്സിനെ അഞ്ച് വിക്കറ്റിനാണ് ഇന്ത്യ ചാംപ്യന്സ് തകര്ത്തത്.
നേരത്തെ ഗ്രൂപ്പ് മല്സരത്തിലും ഇന്ത്യ -പാകിസ്താന് മല്സരം ഉപേക്ഷിച്ചിരുന്നു. പാകിസ്താനെതിരായ മല്സരിക്കാനില്ലെന്ന് വ്യക്തമാക്കി ഇന്ത്യ പിന്മാറിയതിനാലാണ് മല്സരം ഉപേക്ഷിക്കേണ്ടി വന്നത്. പഹല്ഗാം ആക്രമണം നടന്നപ്പോള് ഇന്ത്യക്കെതിരെ പ്രകോപനപരമായ പ്രസ്താവനകള് നടത്തിയ ഷഹീദ് അഫ്രീദി നയിക്കുന്ന പാക് ടീമിനെതിരെ മല്സരിക്കാനില്ലെന്ന് വ്യക്തമാക്കി ഇന്ത്യ ചാംപ്യന്സ് താരമായ ശിഖര് ധവാന് പിന്മാറിയതിന് പിന്നാലെയാണ് യുവരാജ് സിംഗ്, സുരേഷ് റെയ്ന, യൂസഫ് പത്താന് അടക്കമുള്ളവര് പിന്മാറിയത്. തുടര്ന്നായിരുന്നു സംഘാടകര് ഗ്രൂപ്പ് മത്സരം ഉപേക്ഷിച്ചത്.