ട്വന്റി-20 ലോകകപ്പ് ഷെഡ്യൂള് പുറത്ത്; ഫെബ്രുവരി 15ന് ഇന്ത്യയും പാകിസ്താനും ഏറ്റുമുട്ടും
ന്യൂഡല്ഹി: 2026 ലെ ട്വന്റി-20 ലോകകപ്പ് ഔദ്യോഗിക ഷെഡ്യൂള് അന്താരാഷ്ട്ര ക്രിക്കറ്റ് കൗണ്സില് പ്രഖ്യാപിച്ചു. ആതിഥേയരും നിലവിലെ ചാംപ്യന്മാരായ ഇന്ത്യയും ചിരവൈരികളായ പാകിസ്താനും ഒരേ ഗ്രൂപ്പിലാണ്. ഫെബ്രുവരി 15 ന് കൊളംബോയിലെ ആര് പ്രേമദാസ സ്റ്റേഡിയത്തില് ഇരുടീമും ഏറ്റുമുട്ടും. ടൂര്ണമെന്റ് 2026 ഫെബ്രുവരി 7 ന് ആരംഭിക്കും. ഫൈനല് മാര്ച്ച് 8 ന് അഹമ്മദാബാദിലെ നരേന്ദ്ര മോദി സ്റ്റേഡിയത്തില് നടക്കും. രണ്ട് സെമിഫൈനലുകളും കൊല്ക്കത്തയിലും മുംബൈയിലുമായി നടക്കും. 2026 ഫെബ്രുവരി 7 ന് കൊളംബോയില് പാകിസ്താനും നെതര്ലാന്ഡ്സും തമ്മിലുള്ള മല്സരത്തോടെയാണ് 2026 ട്വന്റി-20 ലോകകപ്പ് ആരംഭിക്കുന്നത്. പാകിസ്താന് ഫൈനലില് എത്തിയാല് കൊളംബോയിലായിരിക്കും മല്സരം നടക്കുക. 2024 ലെ ട്വന്റി-20 ലോകകപ്പ് വിജയിച്ച ക്യാപ്റ്റനും ഇതിഹാസ ഇന്ത്യന് ക്രിക്കറ്റ് താരവുമായ രോഹിത് ശര്മ്മ 2026 ലെ ട്വന്റി-20 ലോകകപ്പിന്റെ ബ്രാന്ഡ് അംബാസഡറാകും. പത്ത് വര്ഷത്തിന് ശേഷമാണ് ട്വന്റി-20 ലോകകപ്പ് ഇന്ത്യയില് തിരിച്ചെത്തുന്നത്.
ഇന്ത്യ, പാകിസ്താന്, ശ്രീലങ്ക, ബംഗ്ലാദേശ്, അഫ്ഗാനിസ്ഥാന്, യുഎഇ, ഒമാന്, വെസ്റ്റ് ഇന്ഡീസ്, യുഎസ്എ, കാനഡ, ഓസ്ട്രേലിയ, ന്യൂസിലാന്ഡ്, ദക്ഷിണാഫ്രിക്ക, നമീബിയ, സിംബാബ്വെ, അയര്ലന്ഡ്, ഇംഗ്ലണ്ട്, നെതര്ലാന്ഡ്സ്, ഇറ്റലി, നേപ്പാള് എന്നിങ്ങനെ ആകെ 20 ടീമുകള് അടുത്ത വര്ഷം നടക്കുന്ന ലോകകപ്പില് കളി്ക്കും.
ഗ്രൂപ്പ് എ: ഇന്ത്യ, യുഎസ്എ, നമീബിയ, നെതര്ലന്ഡ്സ്, പാകിസ്താന്
ഗ്രൂപ്പ് ബി: ഓസ്ട്രേലിയ, ശ്രീലങ്ക, സിംബാബ്വെ, അയര്ലന്ഡ്, ഒമാന്
ഗ്രൂപ്പ് സി: ഇംഗ്ലണ്ട്, വെസ്റ്റ് ഇന്ഡീസ്, ബംഗ്ലാദേശ്, ഇറ്റലി, നേപ്പാള്
ഗ്രൂപ്പ് ഡി: ദക്ഷിണാഫ്രിക്ക, ന്യൂസിലന്ഡ്, അഫ്ഗാനിസ്താന്, കാനഡ, യുഎഇ.