ഇന്ത്യാ-ഓസ്ട്രേലിയ രണ്ടാം ട്വന്റി-20 ഇന്ന് മെല്ബണില്
ഇന്ത്യയില് സ്റ്റാര് സ്പോര്ട്സിലും ജിയോ ഹോട് സ്റ്റാറിലും മല്സരം തല്സമയം കാണാനാവും.
മെല്ബണ്: ഓസ്ട്രേലിയക്കെതിരായ ട്വന്റി-20 പരമ്പരയില് ഇന്ത്യ ഇന്ന് രണ്ടാം മല്സരത്തിന് ഇറങ്ങുന്നു. മെല്ബണില് ഇന്ത്യന് സമയം ഉച്ചക്ക് 1.45നും ഓസ്ട്രേലിയന് സമയം രാത്രി 7.15നുമാണ് മത്സരം തുടങ്ങുന്നത്. പരമ്പരയില് കാന്ബറയില് നടന്ന ആദ്യ മല്സരം മഴമൂലം ഉപേക്ഷിച്ചിരുന്നു. പരമ്പരയില് ആദ്യ ജയം തേടിയാണ് ഇരുടീമുകളും ഇറങ്ങുന്നത്. ആദ്യ മല്സരത്തില് മികച്ച രിതിയിലാണ് ഇന്ത്യന് താരങ്ങള് ബാറ്റ് വീശിയത്. അതുകൊണ്ട് തന്നെ ഇന്ന് ഇന്ത്യയുടെ പ്ലേയിങ് ഇലവനില് കാര്യമായ മാറ്റങ്ങള് വരുത്താന് സാധ്യതയില്ല. അഭിഷേക് ശര്മ നേരത്തെ പുറത്തായെങ്കിലും ക്യാപ്റ്റന് സൂര്യകുമാര് യാദവ് ഫോമിലേക്ക് മടങ്ങിയെത്തിതിന്റെ സൂചനകള് നല്കിയതും ശുഭ്മാന് ഗില് ഓപ്പണറായി തിളങ്ങിയതും ഇന്ത്യക്ക് ആശ്വാസകരമാണ്.
ഏകദിന പരമ്പര കൈവിട്ട ഇന്ത്യന് ടീമിന് ട്വന്റി-20 പരമ്പരയില് വിജയം അനിവാര്യമാണ്. മെല്ബണിലെ സാഹചര്യങ്ങള് കണക്കിലെടുത്ത് കുല്ദീപിന് പകരം അര്ഷ്ദീപ് സിങിന് അവസരം നല്കുമോ എന്ന് മാത്രമാണ് കണ്ടറിയേണ്ടത്.
ആഷസ് പരമ്പരക്കുള്ള മുന്നൊരുക്കത്തിന്റെ ഭാഗമായി പോകുന്നതിനാല് ജോഷ് ഹേസല്വുഡ് പരമ്പരയില് ഓസീസിനായി കളിക്കുന്ന അവസാന മല്സരമാണിത്. അതുകൊണ്ട് തന്നെ പേസ് നിരയില് ഓസീസ് ഷോണ് ആബട്ടിന് ഇന്ന് അവസരം നല്കുമെന്നാണ് കരുതുന്നത്. മത്സരത്തിന് മഴ ഭീഷണിയില്ലെന്നാണ് കാലാവസ്ഥാ റിപ്പോര്ട്ട്. ഇന്ത്യയില് സ്റ്റാര് സ്പോര്ട്സിലും ജിയോ ഹോട് സ്റ്റാറിലും മല്സരം തല്സമയം കാണാനാവും. 90000 പേര്കിരിക്കാവുന്ന സ്റ്റേഡിയത്തില് മല്സരത്തിനുള്ള ടിക്കറ്റുകളെല്ലാം നേരത്തെ വിറ്റുപോയിരുന്നു.