ബിഹാര് ക്രിക്കറ്റ് ടീമിന്റെ വൈസ് ക്യാപ്റ്റനായി പതിനാലുകാരന് വൈഭവ് സൂര്യവന്ഷി
പാട്ന: രഞ്ജി ട്രോഫിക്കുള്ള ബിഹാര് ക്രിക്കറ്റ് ടീമിന്റെ വൈസ് ക്യാപ്റ്റനായി പതിനാലുകാരന് വൈഭവ് സൂര്യവന്ഷി. സാക്കിബുള് ഗനിയാണ് രഞ്ജി ട്രോഫിയില് ബിഹാറിനെ നയിക്കുക. രഞ്ജി ട്രോഫിയില് കഴിഞ്ഞ വര്ഷം ജനുവരിയില് മുംബൈക്കെതിരെ ആണ് വൈഭവ് ഫസ്റ്റ് ക്ലാസ് ക്രിക്കറ്റില് അരങ്ങേറിയത്. ഇതുവരെ ബിഹാറിനായി അഞ്ച് ഫസ്റ്റ് ക്ലാസ് മല്സരങ്ങളില് മാത്രം കളിച്ച വൈഭവ് 100 റണ്സാണ് നേടിയത്. 41 റണ്സാണ് മികച്ച സ്കോര്. രഞ്ജി ട്രോഫിയില് ഈ മാസം 15ന് അരുണാചല്പ്രദശിനെതിരെ ആണ് ബിഹാറിന്റെ ആദ്യ മല്സരം.
ഈ വര്ഷം ഐപിഎല്ലിലും വൈഭവ് അരങ്ങേറിയിരുന്നു. നായകന് സഞ്ജു സാംസണ് പരിക്കേറ്റതോടെ രാജസ്ഥാന് റോയല്സിനായി ഓപ്പണറായി ഇറങ്ങി വൈഭവ് ഗുജറാത്ത് ടൈറ്റന്സിനെതിരായ മല്സരത്തില് 35 പന്തില് സെഞ്ചുറി അടിച്ച് ഐപിഎല് ചരിത്രത്തില് ഇന്ത്യന് താരത്തിന്റെ വേഗമേറിയ സെഞ്ചുറിയുടെ റെക്കോര്ഡ് സ്വന്തമാക്കിയിരുന്നു. ഐപിഎല്ലില് രാജസ്ഥാന് റോയല്സിനായി ഏഴ് മല്സരങ്ങളില് കളിച്ച വൈഭവ് 206.55 പ്രഹരശേഷിയില് 252 റണ്സാണ് നേടിയത്. ഐപിഎല്ലിന് ശേഷ ഇന്ത്യ അണ്ടര് 19 ടീമിനായി ഇംഗ്ലണ്ടിനെതിരെയും ഓസ്ട്രേലിയക്കെതിരെയും യൂത്ത് ടെസ്റ്റിലും വൈഭവ് കളിച്ചിരുന്നു.