മിറാപൂര്‍: ട്വന്റിയിലെ ലോക ചാംപ്യന്‍മാരായ ഇംഗ്ലണ്ടിനെതിരേ ട്വന്റി-20 പരമ്പര നേട്ടവുമായി ബംഗ്ലാദേശ്. ബംഗ്ലാദേശില്‍ നടക്കുന്ന പരമ്പരയിലെ രണ്ടാം മല്‍സരത്തില്‍ ആതിഥേയര്‍ നാല് വിക്കറ്റിന്റെ ജയമാണ് നേടിയത്. നേരത്തെ ആദ്യ മല്‍സരത്തിലും ബംഗ്ലാദേശ് ജയിച്ചിരുന്നു. ഇന്ന് ആദ്യം ബാറ്റ് ചെയ്ത ഇംഗ്ലണ്ടിനെ നിശ്ചിത ഓവറില്‍ 117 റണ്‍സിന് ബംഗ്ലാദേശ് എറിഞ്ഞിട്ടിരുന്നു. മറുപടി ബാറ്റിങില്‍ ഏഴ് പന്ത് ശേഷിക്കെ ആറ് വിക്കറ്റ് നഷ്ടത്തില്‍ ബംഗ്ലാദേശ് 120 റണ്‍സെടുത്ത് ജയം ഉറപ്പിക്കുകയായിരുന്നു. നജ്മുള്‍ ഹുസൈന്‍ ഷാന്റോയാണ് ടോപ് സ്‌കോറര്‍. താരം 47 പന്തില്‍ 46 റണ്‍സെടുത്ത് പുറത്താവാതെ നിന്നു. തൗഹീദ് ഹൃദോയ് (17), മെഹ്ദി ഹസ്സന്‍ (20) എന്നിവരാണ് രണ്ടക്കം കടന്ന മറ്റ് ബംഗ്ലാ താരങ്ങള്‍.