'ഒരു ഇന്ത്യ ഒരു ജനത' പരിപാടി വെള്ളിയാഴ്ച ഷാര്ജയില്; രമേശ് ചെന്നിത്തല ഉദ്ഘാടനം ചെയ്യും
രമേശ് ചെന്നിത്തലയുടെ മൂന്നു ദിവസത്തെ യുഎഇ സന്ദര്ശനത്തിന്റെ ഭാഗമായി ഇന്ന് അദ്ദേഹം ദുബയില് എത്തും.
ദുബയ്: പ്രതിപക്ഷ നേതാവ് രമേശ് ചെന്നിത്തലയുടെ മൂന്നു ദിവസത്തെ യുഎഇ സന്ദര്ശനത്തിന്റെ ഭാഗമായി ഇന്ന് അദ്ദേഹം ദുബയില് എത്തും. രാത്രി ഒന്പതിന് ദുബയ് രാജ്യാന്തര വിമാനത്താവളത്തില് എത്തിച്ചേരുന്ന അദ്ദേഹത്തിന് പ്രവര്ത്തകര് ഊഷ്മളമായ സ്വീകരണം നല്കും.
13 ന് കേരളത്തില് നിന്നുള്ള യുവ സംരംഭകരുടെ നേതൃത്വത്തില് സംഘടിപ്പിക്കുന്ന, 'കേരള കോണ്ക്ലേവില്'അദേഹം മുഖ്യപ്രഭാഷണം നടത്തും. 14 ന് വൈകിട്ട് ഏഴിന് ഇന്കാസ് യുഎഇ കേന്ദ്ര കമ്മിറ്റി, 'ഒരു ഇന്ത്യ ഒരു ജനത' എന്ന സന്ദേശത്തില് സംഘടിപ്പിക്കുന്ന പൊതുപരിപാടി രമേശ് ചെന്നിത്തല ഉദ്ഘാടനം ചെയ്യും. ഷാര്ജയിലെ ഇന്ത്യന് അസോസിയേഷന് ഹാളിലാണ് ആയിരങ്ങള് പങ്കെടുക്കുന്ന പരിപാടി. യുഎഇയിലെ ഏഴ് എമിറേറ്റുകളില് നിന്നും, അല് ഐന് മേഖലയില് നിന്നുമായി നിരവധി പ്രവര്ത്തകര് ഷാര്ജയിലെ പൊതുപരിപാടിയില് സംബന്ധിക്കുമെന്ന് ഇന്കാസ് യുഎഇ പ്രസിഡന്റ് മഹാദേവന് വാഴശ്ശേരിയില് ജനറല് സെക്രട്ടറി പുന്നക്കന് മുഹമ്മദലി എന്നിവര് അറിയിച്ചു.