ദുബായ്: ഇറാനില് നിന്നുള്ള 'യുറാനസ് സ്റ്റാര്' കുപ്പിവെള്ളമോ ബ്രാന്ഡില് നിന്നുള്ള മറ്റേതെങ്കിലും ഉല്പ്പന്നങ്ങളോ ഇറക്കുമതി ചെയ്യുന്നതിനോ വ്യാപാരം ചെയ്യുന്നതിനോ ഔദ്യോഗിക അനുമതി നല്കിയിട്ടില്ലെന്ന് യുഎഇ കാലാവസ്ഥാ വ്യതിയാന പരിസ്ഥിതി മന്ത്രാലയം (MoCCAE) അറിയിച്ചു.യുറാനസ് സ്റ്റാര് കുപ്പിവെള്ളത്തിന്റെ ഉപഭോഗത്തെയും വിതരണത്തെയും കുറിച്ച് കാലാവസ്ഥാ വ്യതിയാന പരിസ്ഥിതി മന്ത്രാലയം (MoCCAE) ട്വീറ്റിലൂടെയാണ് ഇക്കാര്യം വ്യക്തമാക്കിയത്.
'യുറാനസ് സ്റ്റാര്' കുപ്പിവെള്ളം കുടിച്ച് ഒമാനില് രണ്ട് പേര് അടുത്തിടെ മരിച്ചതിനെ തുടര്ന്നാണ് പ്രഖ്യാപനം വന്നത്. സെപ്റ്റംബര് 29 ന് ഒമാനിലുണ്ടായിരുന്ന ഒരു പ്രവാസി സ്ത്രീ മരിച്ചു, ഒക്ടോബര് 1 ന് ഒരു ഒമാനി സ്വദേശിയും മരണമടഞ്ഞിരുന്നു. ഇതിനെ തുടര്ന്നാണ് യുഎഇ ഇക്കാര്യം വ്യക്തമാക്കിയത്.
രാജ്യത്തെ പ്രധാന റീട്ടെയില് ഔട്ട്ലെറ്റുകളില് ഈ ഉല്പ്പന്നങ്ങള് കണ്ടെത്തിയിട്ടില്ലെന്നും മന്ത്രാലയം സ്ഥിരീകരിച്ചു. പ്രാദേശിക വിപണി സംഭവവികാസങ്ങള് തുടര്ച്ചയായി നിരീക്ഷിക്കുന്നതിന്റെ ഭാഗമായി, പ്രത്യേകിച്ച് അയല്രാജ്യത്ത് ഇതേ ഉല്പ്പന്നത്തില് ദോഷകരമായ വസ്തുക്കളാല് മലിനീകരണം സ്ഥിരീകരിച്ച സാഹചര്യത്തില്, സ്ഥിരീകരണത്തിനുള്ള അടിയന്തര നടപടികള് സജീവമാക്കിയിട്ടുണ്ടെന്ന് മന്ത്രാലയം വ്യക്തമാക്കി.
യുറാനസ് സ്റ്റാര് ബ്രാന്ഡിന്റെ ഇറക്കുമതിക്ക് പെര്മിറ്റുകളോ അംഗീകാരങ്ങളോ നല്കിയിട്ടില്ലെന്ന് ഉറപ്പാക്കാന് മന്ത്രാലയം നടപടിക്രമങ്ങളും മേല്നോട്ടവും ശക്തമാക്കിയിട്ടുണ്ട്.ഈ ബ്രാന്ഡിന്റെ ഉല്പ്പന്നങ്ങള് ഉപേക്ഷിക്കാന് മന്ത്രാലയം ആവശ്യപ്പെട്ടിട്ടുണ്ട്. ഉപഭോക്താക്കളുടെ ആരോഗ്യവും സുരക്ഷയും സംരക്ഷിക്കുന്നതിനുള്ള പ്രതിജ്ഞാബദ്ധത മന്ത്രാലയം ആവര്ത്തിച്ച് വ്യക്തമാക്കി. പ്രചാരത്തിലുള്ള എല്ലാ ഭക്ഷ്യ ഉല്പന്നങ്ങളുടെയും സുരക്ഷ ഉറപ്പാക്കുന്നതിനും ഈ മേഖലയില് മികച്ച അന്താരാഷ്ട്ര രീതികള് പ്രയോഗിക്കുന്നതിനും സംയോജിത നിയന്ത്രണ സംവിധാനം തുടര്ച്ചയായി പ്രവര്ത്തിക്കുന്നുണ്ടെന്നും യു എഇ അറിയിച്ചു.
ഒമാനില് രണ്ട് മരണങ്ങള് സംഭവിച്ചതിനെ തുടര്ന്ന് ഒമാനി അധികൃതര് പൊതുജനങ്ങള്ക്ക് മുന്നറിയിപ്പ് നല്കുകയും ഉല്പ്പന്നം തിരിച്ചുവിളിക്കുകയും ചെയ്തു. ലബോറട്ടറി പരിശോധനയില് 'യുറാനസ് സ്റ്റാര്' കുപ്പിവെള്ളത്തില് 'ആംഫെറ്റാമൈന്' അടങ്ങിയിട്ടുണ്ടെന്ന് കണ്ടെത്തി.