കുവൈത്ത്: കൊറോണ വൈറസ് പടരുന്നത് തടയാന്‍ കൂടുതല്‍ കര്‍ശന നടപടികളുമായി സര്‍ക്കാര്‍ രംഗത്ത്. ഇന്നുമുതല്‍ എല്ലാ സിനിമാശാലകളും ഹോട്ടല്‍ പാര്‍ട്ടി ഹാളുകളും വിവാഹ പാര്‍ട്ടി ഹാളുകളും താല്‍ക്കാലികമായി നിര്‍ത്തിവയ്ക്കാന്‍ നിര്‍ദേശം നല്‍കി. കുവൈത്ത് കാബിനറ്റിന്റെ നിര്‍ദേശപ്രകാരമാണ് നടപടി. ഇതോടെ രാജ്യത്ത് ആളുകള്‍ ഒത്തുകൂടുന്നതിനുള്ള സാഹചര്യം ഒഴിവാക്കാനാവുമെന്നും അതുവഴി വൈറസ് ബാധ വ്യാപിക്കുന്നത് തടയാന്‍ സഹായകമാകുമെന്നാണു വിലയിരുത്തല്‍. കുവൈത്തിലെ മുഴുവന്‍ വിദ്യാഭ്യാസ സ്ഥാപനങ്ങള്‍ക്കും മാര്‍ച്ച് 26 വരെ അവധിയും നല്‍കിയിട്ടുണ്ട്. കൊറോണ വൈറസ് ബാധിച്ചവരുടെ എണ്ണം 65 ആയി സ്ഥിരീകരിച്ചു.