ഞെട്ടിക്കുന്ന പ്രഖ്യാപനവുമായി ട്രംപ്; ആണവായുധ പരീക്ഷണങ്ങള് ഉടന് പുനരാരംഭിക്കും
വാഷിങ്ടണ്: ആണവായുധ പരീക്ഷണങ്ങള് ഉടന് പുനഃരാരംഭിക്കുമെന്ന് പ്രഖ്യാപിച്ച് അമേരിക്കന് പ്രസിഡന്റ് ഡോണള്ഡ് ട്രംപ്. മറ്റ് രാജ്യങ്ങളുടെ ആണവ പരീക്ഷണങ്ങള്ക്ക് മറുപടിയായി അമേരിക്കയുടെ ആണവായുധങ്ങള് പരീക്ഷിക്കാന് പ്രതിരോധ വകുപ്പിന് നിര്ദ്ദേശം നല്കിയതായി ട്രംപ് പറഞ്ഞു. 1992 മുതല് അമേരിക്ക സ്വമേധയാ നിലനിര്ത്തിയിരുന്ന ആണവ പരീക്ഷണ മൊറട്ടോറിയം അവസാനിപ്പിച്ചുകൊണ്ടാണ് ഈ പ്രഖ്യാപനം.
തന്റെ ഭരണകാലത്ത് നിലവിലുള്ള ആണവായുധങ്ങള് പൂര്ണ്ണമായി നവീകരിച്ചതിലൂടെ അമേരിക്ക ലോകത്തിലെ ഏറ്റവും കൂടുതല് ആണവായുധങ്ങള് കൈവശം വെക്കുന്ന രാജ്യമായി മാറിയെന്ന് ട്രംപ് അവകാശപ്പെട്ടു. റഷ്യയാണ് രണ്ടാം സ്ഥാനത്തെന്നും ചൈന മൂന്നാം സ്ഥാനത്താണെന്നും എന്നാല് അഞ്ചു വര്ഷത്തിനുള്ളില് ചൈനയും മുന്നിലെത്തുമെന്നും അദ്ദേഹം പറഞ്ഞു. തന്റെ എക്സ് പ്ലാറ്റ്ഫോമില് പങ്കുവെച്ച പോസ്റ്റിലാണ് ട്രംപ് ഇക്കാര്യങ്ങള് വ്യക്തമാക്കിയത്.
'മറ്റ് രാജ്യങ്ങളുടെ പരീക്ഷണ പരിപാടികള് കാരണം, നമ്മുടെ ആണവായുധങ്ങള് തുല്യമായ അടിസ്ഥാനത്തില് പരീക്ഷിക്കാന് ഞാന് പ്രതിരോധ വകുപ്പിനോട് നിര്ദ്ദേശിച്ചിട്ടുണ്ട്. ആ പ്രക്രിയ ഉടന് ആരംഭിക്കും. ഈ വിഷയത്തില് ശ്രദ്ധ ചെലുത്തിയതിന് നന്ദി,' ട്രംപ് കൂട്ടിച്ചേര്ത്തു. റഷ്യ ആണവശേഷിയുള്ള രണ്ട് ആയുധങ്ങള് പരീക്ഷിച്ചതിന് പിന്നാലെയാണ് ട്രംപിന്റെ ഈ പ്രഖ്യാപനം. മോസ്കോ പറയുന്നതനുസരിച്ച്, 9M730 ബുറേവെസ്റ്റ്നിക് ക്രൂയിസ് മിസൈലും പോസിഡോണ് അന്തര്വാഹിനി ഡ്രോണും ദീര്ഘദൂരം ആണവശേഷി വഹിക്കാന് കഴിവുള്ളവയാണ്.
ഈ പരീക്ഷണങ്ങളെ ട്രംപ് 'അനുചിതമെന്ന്' വിശേഷിപ്പിക്കുകയും യുക്രൈനിലെ യുദ്ധം അവസാനിപ്പിക്കാന് പുടിനോട് ആവശ്യപ്പെടുകയും ചെയ്തിരുന്നു. 'പുടിന് പറയുന്നതും ശരിയല്ല. എന്തായാലും അദ്ദേഹം യുദ്ധം അവസാനിപ്പിക്കണം. ഒരാഴ്ച കൊണ്ട് തീരേണ്ടിയിരുന്ന യുദ്ധം ഇപ്പോള് നാലാം വര്ഷത്തിലേക്ക് കടന്നിരിക്കുന്നു. മിസൈലുകള് പരീക്ഷിക്കുന്നതിന് പകരം അദ്ദേഹം ചെയ്യേണ്ടത് അതാണ്,' ട്രംപ് പറഞ്ഞു.
പോസിഡോണ് അന്തര്വാഹിനി ഡ്രോണ് തടയാന് നിലവില് മറ്റൊന്നിനും കഴിയില്ലെന്നും ഇത് റഷ്യയുടെ പ്രതിരോധ തന്ത്രത്തില് നിര്ണായക പങ്കുവഹിക്കുന്നുണ്ടെന്നും പുടിന് അവകാശപ്പെട്ടു. അതേസമയം, ബുറേവെസ്റ്റ്നിക് ക്രൂയിസ് മിസൈലിന്റെ ആണവ റിയാക്ടര് അന്തര്വാഹിനികളിലേതിനേക്കാള് '1,000 മടങ്ങ് ചെറുതാണ്' എന്നും അന്തര്വാഹിനികളില് മണിക്കൂറുകള് എടുക്കുന്നതിന് പകരം മിനിറ്റുകള്ക്കുള്ളില് ഇത് പ്രവര്ത്തിപ്പിക്കാന് കഴിയുമെന്നും അദ്ദേഹം പറഞ്ഞിരുന്നു.
ട്രംപിന്റെ ഈ പ്രഖ്യാപനം ലോകമെമ്പാടും ആശങ്കയുളവാക്കിയിട്ടുണ്ട്. ആണവായുധങ്ങളുടെ ഉപയോഗം സംബന്ധിച്ചുള്ള ഏതൊരു നീക്കവും ഗുരുതരമായ പ്രത്യാഘാതങ്ങള് ഉണ്ടാക്കുമെന്നാണ് വിദഗ്ധര് പറയുന്നത്. ആണവായുധങ്ങള് പരീക്ഷിക്കുന്നത് മറ്റ് രാജ്യങ്ങളെ പ്രകോപിപ്പിക്കാനും ഇത് കൂടുതല് ആണവായുധ പരീക്ഷണങ്ങള്ക്ക് കാരണമാകാനും സാധ്യതയുണ്ട്. ഇത് ലോകത്തെ കൂടുതല് അപകടകരമായ അവസ്ഥയിലേക്ക് നയിച്ചേക്കാം. അതിനാല്, ആണവായുധങ്ങള് സംബന്ധിച്ചുള്ള ഏത് നീക്കവും വളരെ ശ്രദ്ധയോടെയും ലോകസമാധാനം മുന്നിര്ത്തിയും ആയിരിക്കണം എന്നും വിദഗ്ധര് അഭിപ്രായപ്പെടുന്നു.