മോസ്‌കോ: പ്രാദേശിക തിരഞ്ഞെടുപ്പില്‍ പ്രതിപക്ഷ സ്ഥാനാര്‍ഥികളെ മല്‍സരിക്കുന്നതില്‍ നിന്നും വിലക്കേര്‍പ്പെടുത്തിയ സര്‍ക്കാര്‍ നടപടിക്കെതിരേ പ്രതിഷേധിക്കാനെത്തിയ റഷ്യന്‍ പ്രതിപക്ഷ നേതാവ് ല്യുബോവ് സോബലിനെ പോലിസ് അറസ്റ്റ് ചെയ്തു. പ്രതിഷേധം നടക്കുന്ന രാജ്യതലസ്ഥാനത്തെത്തിയ ല്യുബോവിനെ പ്രതിഷേധറാലിയില്‍ പങ്കെടുക്കുന്നതിനു മുമ്പെ പോലിസ് കസ്റ്റഡിയിലെടുത്തു. സമരം നടക്കുന്നിടത്തേക്ക് ടാക്‌സിയിലെത്തിയ ഇവരെ പോലിസ് ബലംപ്രയോഗിച്ച് അറസ്റ്റ് ചെയ്തു നീക്കുകയായിരുന്നു. ല്യുബോവിനെ കൂടാതെ 33പേരെയും അറസ്റ്റ് ചെയ്തിട്ടുണ്ട്. അനുമതിയില്ലാതെ തലസ്ഥാനത്ത് സമരം സംഘടിപ്പിച്ചതിനും പ്രതിഷേധക്കാരെ തെരുവിലിറക്കിയതിനുമാണ് അറസ്റ്റ്.