ജിദ്ദ വിമാനത്താവളത്തിലെ പ്രതിസന്ധി: സിഇഒയെ മാറ്റി
റിയാദ് വിമാനത്താവള കമ്പനി അസിസ്റ്റന്റ് സിഇഒയായിരുന്ന ഐമന് ബിന് അബ്ദുല് അസീസ് അബൂ ഉബാദയെ പുതിയ സിഇഒയായി നിയമിച്ചു.
ജിദ്ദ: ജിദ്ദ വിമാനത്താവള കമ്പനി സിഇഒ റയാന് അല്തറാബ്സൂനിയെ തത്സ്ഥാനത്ത് നിന്ന് നീക്കിയതായി കമ്പനി ഡയറക്ടര് ബോര്ഡ് അറിയിച്ചു. കഴിഞ്ഞ ദിവസം ജിദ്ദ വിമാനത്താവളത്തിലുണ്ടായ യാത്രാ പ്രതിസന്ധിയെ തുടര്ന്നാണ് സ്ഥാന ചലനം. റിയാദ് വിമാനത്താവള കമ്പനി അസിസ്റ്റന്റ് സിഇഒയായിരുന്ന ഐമന് ബിന് അബ്ദുല് അസീസ് അബൂ ഉബാദയെ പുതിയ സിഇഒയായി നിയമിച്ചു. ഇന്നലെ ചേര്ന്ന ഡയറക്ടര് ബോര്ഡിന്റെ അസാധാരണ യോഗത്തിലാണ് തീരുമാനം.
ജിദ്ദ വിമാനത്താവളത്തില് നിരവധി വിമാനങ്ങള് വൈകുകയും ഉംറ തീര്ഥാടകരടക്കം ധാരാളം പേരുടെ യാത്രകള് മുടങ്ങുകയും ചെയ്ത സംഭവം അന്വേഷിക്കാന് ഗതാഗതമന്ത്രി എഞ്ചിനീയര് സാലിഹ് അല്ജാസിര് പ്രത്യേക സമിതിയെ നിയോഗിച്ചിരുന്നു. ഒരാഴ്ചക്കകം റിപോര്ട്ട് നല്കാനാണ് മന്ത്രി ആവശ്യപ്പെട്ടിരിക്കുന്നത്.