തെഹ്‌റാന്‍: ഇറാന്‍ സൈനിക ജനറല്‍മാരെ വധിക്കുമെന്ന് തെളിയിക്കുന്ന ഇസ്രായേലിന്റെ ശബ്ദ സന്ദേശം പുറത്ത്. ഇറാന്‍ ഭരണകൂടത്തെയും ആയത്തുളള അലി ഖമീനിയുടെ അധികാരത്തെയും തളളിപ്പറഞ്ഞ് വീഡിയോ ചിത്രീകരിച്ച് നല്‍കിയില്ലെങ്കില്‍ കൊന്നുകളയുമെന്നായിരുന്നു സൈനിക ഉദ്യോഗസ്ഥര്‍ക്ക് ലഭിച്ച ഭീഷണി.
സര്‍ക്കാരിനെ അട്ടിമറിക്കാനും സൈന്യത്തില്‍ പിളര്‍പ്പുണ്ടാക്കാനും ഇസ്രായേല്‍ ശ്രമിച്ചുവെന്ന വാദങ്ങളെ ബലപ്പെടുത്തുന്നതാണ് പുറത്ത് വന്ന സന്ദേശം. ഭാര്യയും കുഞ്ഞുമായി രക്ഷപെടാന്‍ 12 മണിക്കൂര്‍ തരാം. അല്ലെങ്കില്‍ നിങ്ങള്‍ ഞങ്ങളുടെ ഹിറ്റ്‌ലിസ്റ്റില്‍പ്പെടും എന്നാണ് ഒരു ഉദ്യോഗസ്ഥന് ലഭിച്ച സന്ദേശം.
ഇറാന്റെ വിവിധ ശ്രേണികളിലുളള സൈനിക ഉദ്യോഗസ്ഥര്‍ക്ക് ഇസ്രായേലില്‍ നിന്നും പലതരം ഭീഷണികള്‍ വരുന്നതായി റിപോര്‍ട്ടുണ്ട്. ഇറാന്റെ ഭരണകൂടത്തെ തകര്‍ക്കുന്നതിനായി ബാഹ്യശക്തികള്‍ ശ്രമിക്കുന്നതായാണ് ആരോപണം ഉയര്‍ന്നിരുന്നത്. സൈനിക ഉദ്യോഗസ്ഥര്‍ക്ക് ശബ്ദ സന്ദേശം ലഭിച്ചതിന് പുറമേ ഉദ്യോഗസ്ഥരുടെ വീടുകളില്‍ എത്തി അജ്ഞാത കത്തുകള്‍ നിക്ഷേപിച്ചും കുടുംബാംഗങ്ങളുടെ ഫോണുകളിലേക്ക് ഭീഷണി സന്ദേശം ചാരന്‍മാര്‍ അയച്ചതായും കണ്ടെത്തിയിട്ടുണ്ട്.
