കൊല്ലപ്പെട്ടെന്ന അഭ്യൂഹങ്ങള്ക്കിടെ പാക് മുന് പ്രധാനമന്ത്രി ഇമ്രാന് ഖാനെ ജയിലിലെത്തി കണ്ട് സഹോദരി
ലാഹോര് : കൊല്ലപ്പെട്ടെന്ന അഭ്യൂഹങ്ങള്ക്കിടെ പാകിസ്താന് മുന് പ്രധാനമന്ത്രി ഇമ്രാന് ഖാനെ ജയിലിലെത്തി കണ്ട് സഹോദരി ഡോ. ഉസ്മ ഖാന്. റാവല്പിണ്ടിയിലെ ആദിയാല ജയിലിലെത്തിയാണ് ഇമ്രാനെ കണ്ടത്. ഏകാന്ത തടവിലുള്ള ഇമ്രാന് ശാരീരികമായി പ്രശ്നങ്ങളില്ലെന്നും എന്നാല് മാനസികമായി സമ്മര്ദ്ദത്തിലാക്കാന് ജയില് അധികൃതര് ശ്രമിക്കുകയാണെന്നും ഉസ്മ പറഞ്ഞു. നൂറുകണക്കിന് പിടിഐ പ്രവര്ത്തകര്ക്കൊപ്പം ജയിലിന് മുന്നിലെത്തിയ ഉസ്മയെ മണിക്കൂറുകള് കാത്തു നിന്ന ശേഷമാണ് അകത്തു കടക്കാന് അനുവദിച്ചത്. ഒക്ടോബര് 27ന് ശേഷം ആദ്യമായാണ് ഇമ്രാനെ കാണാന് കുടുംബാംഗത്തെ അനുവദിക്കുന്നത്. ആഴ്ചകളായി കുടുംബാംഗങ്ങള്ക്ക് സന്ദര്ശനാനുമതി നിഷേധിച്ചതോടെ , ഇമ്രാന് മരിച്ചെന്ന അഭ്യൂഹം ഉയര്ന്നിരുന്നു. ഇസ്ലാമാബാദ് ഹൈക്കോടതിക്ക് മുന്നിലടക്കം പിടിഐ പ്രതിഷേധം സംഘടിപ്പിച്ചതിന് പിന്നാലെയാണ് സര്ക്കാര് വഴങ്ങിയത്.
ജയിലില് കഴിയുന്ന ഇമ്രാന് ഖാന് കൊല്ലപ്പെട്ടുവെന്നും മൃതദേഹം ജയിലില് നിന്നും മാറ്റിയെന്നുമടക്കം നേരത്തെ പ്രചരിച്ചിരുന്നു. സഹോദരിമാര്ക്ക് അടക്കം ഇമ്രാന് ഖാനെ കാണാന് അനുമതി നിഷേധിച്ചതോടെയാണ് മരിച്ചുവെന്ന രീതിയില് പ്രചരിച്ചത്. ഇതോടെ ഇമ്രാന് അനുയായികള് തെരുവിലിറങ്ങി. ഇമ്രാന് ഖാന് ജീവനുണ്ടെന്ന് തെളിയിക്കുന്ന വിവരങ്ങള് പുറത്തുവിടണമെന്നും ആവശ്യപ്പെട്ട് കുടുംബാംഗങ്ങളും പി.ടി.ഐ. പ്രവര്ത്തകരും പ്രതിഷേധം ശക്തമാക്കി. കുടുംബാംഗങ്ങളെയും അഭിഭാഷകരെയും കാണാന് ജയില് അധികൃതര് അനുവദിക്കുന്നില്ലെന്ന് കാണിച്ച് ഇമ്രാന് ഖാന്റെ മറ്റൊരു സഹോദരിയായ അലീമ ഖാന് നേരത്തെ ഇസ്ലാമാബാദ് ഹൈക്കോടതിയില് കോടതിയലക്ഷ്യ ഹരജി നല്കിയിരുന്നു.
ആഴ്ചയില് 2 തവണ ഇമ്രാന് ബന്ധുക്കളെയും മറ്റും കാണാന് അവസരമൊരുമെന്നായിരുന്നു ഇസ്ലാമാബാദ് ഹൈക്കോടതി മാര്ച്ചില് നിര്ദ്ദേശിച്ചിരുന്നത്. ഇസ്ലാമാബാദ് ഹൈക്കോടതിയുടെ ഉത്തരവ് ഉണ്ടായിട്ടും കൂടിക്കാഴ്ചകള് നിഷേധിക്കുന്നത് ഇമ്രാന് ഖാന്റെ സുരക്ഷയെയും ആരോഗ്യത്തെയും കുറിച്ചുള്ള ആശങ്ക വര്ദ്ധിപ്പിക്കുന്നുവെന്നും പ്രചാരമുണ്ടായി. ഇതിനിടെയാണ് പി.ടി.ഐ. പ്രവര്ത്തകരുടെ പ്രതിഷേധങ്ങള്ക്കിടയില് ഉസ്മ ഖാനത്തിന് ഇമ്രാന് ഖാനെ സന്ദര്ശിക്കാന് ജയില് അധികൃതര് അനുമതി നല്കിയത്.