എന്തിനാണ് ഇങ്ങനെയൊരു മന്ത്രി; കെഎസ്ആർടിസി ജീവനക്കാർക്ക് ഐക്യദാർഢ്യവുമായി എഐഎസ്എഫ്

കൊല്ലം: കെഎസ്ആർടിസിയിൽ ശമ്പളമില്ലാതെ തൊഴിലെടുക്കുന്ന കെഎസ്ആർടിസി ജീവനക്കാർക്ക് എഐഎസ്എഫ് മധുരം വിതരണം ചെയ്തു. ​ഗതാ​ഗത മന്ത്രി നീതി പാലിക്കുക, ശമ്പള കുടിശിക ഉടൻ കൊടുത്തു തീർക്കുക തുടങ്ങിയ മുദ്രാവാക്യങ്ങളുമായാണ് കൊല്ലം തേവലക്കരയിൽ എഐഎസ്എഫ് പ്രതിഷേധം സംഘടിപ്പിച്ചത്.

ജീവനക്കാർക്ക് ശമ്പളം നൽകാതിരുന്നിട്ട് പോലും ശക്തമായ സമരങ്ങളിലേക്ക് കടന്ന് ജനജീവിതം ദുസ്സഹമാക്കാതെ ജനങ്ങൾക്ക് വേണ്ടി നിസ്വാർത്ഥമായ സേവനം കാഴ്ച വയ്ക്കുന്ന ജീവനക്കാർക്ക് എഐഎസ്എഫ് തേവലക്കര സൗത്ത് മേഖല കമ്മിറ്റിയുടെ നേതൃത്വത്തിലാണ് മധുരം വിതരണം ചെയ്തത്.

അഭിമന്യു ഓമനക്കുട്ടൻ അധ്യക്ഷത വഹിച്ച പ്രതിഷേധം എഐവൈഎഫ് മണ്ഡലം പ്രസിഡന്റ് വിഷ്ണു വേണുഗോപാൽ ഉദ്ഘാടനം ചെയ്തു. മേഖല സെക്രട്ടറി അമൽ സത്യശീലൻ അഭിവാദ്യം ചെയ്തു സംസാരിച്ചു. ബിജിൻ, അനന്ദൻ, ആഷിക്, അഖിൽ, എബിൻ,ഗൗതം തുടങ്ങിയവർ പങ്കെടുത്തു.

ഇടതുപക്ഷ സർക്കാരിന്റെ ജനവിരുദ്ധ നയങ്ങൾക്കെതിരേ സിപിഐ മൗനത്തിലാണെന്നത് ഏറെ വിമർശനങ്ങൾക്ക് വഴിവെച്ച സാഹചര്യത്തിലാണ് എഐഎസ്എഫ് ഇത്തരമൊരു പ്രതിഷേധവുമായി രം​ഗത്തുവന്നത് ശ്രദ്ധേയമാണ്.