കാസര്കോഡ് ഇരട്ടക്കൊലപാതകം: സിപിഎം നേതൃത്വത്തെ പരോക്ഷമായി വിമര്ശിച്ച് വിഎസ്
രാഷ്ട്രീയ പ്രശ്നങ്ങള് ഉന്മൂലനത്തിലൂടെ പരിഹരിക്കുന്നത് സിപിഎമ്മിന്റെ രീതിയല്ല. പാര്ട്ടി അംഗങ്ങളില് അത്തരം ചിന്തകളുണ്ടാവുന്നത് ഗുരുതരമായ വ്യതിയാനമാണ്.
തിരുവനന്തപുരം: കാസര്കോഡ് നടന്ന ഇരട്ടക്കൊലപാതകത്തില് രൂക്ഷമായ വിമര്ശനവുമായി ഭരണപരിഷ്കാര കമ്മീഷന് അധ്യക്ഷനും മുതിര്ന്ന സിപിഎം നേതാവുമായ വി എസ് അച്യുതാനന്ദന്. കൊലപാതകം പൈശാചികവും മനുഷ്യ മനഃസാക്ഷിയെ മരവിപ്പിക്കുന്നതുമാണെന്ന് വിഎസ് വാര്ത്താക്കുറിപ്പില് പറഞ്ഞു. പാര്ട്ടി നേതൃത്വത്തേയും അദ്ദേഹം പരോക്ഷമായി വിമര്ശിക്കുന്നു.
രാഷ്ട്രീയ പ്രശ്നങ്ങള് ഉന്മൂലനത്തിലൂടെ പരിഹരിക്കുന്നത് സിപിഎമ്മിന്റെ രീതിയല്ല. പാര്ട്ടി അംഗങ്ങളില് അത്തരം ചിന്തകളുണ്ടാവുന്നത് ഗുരുതരമായ വ്യതിയാനമാണ്. അത്തരക്കാരെ സിപിഎമ്മില് വെച്ചുപൊറുപ്പിക്കാനാവില്ല. ഇക്കാര്യം പാര്ട്ടി വ്യക്തമാക്കുകയും ചെയ്തിട്ടുണ്ട്. നിഷ്ഠുരമായ ഈ കൊലപാതകങ്ങള് നടത്തിയവര് ആരായാലും നിയമത്തിന്റെ മുന്നിലെത്തുകതന്നെ വേണം. നിയമം അനുശാസിക്കുന്ന ശിക്ഷ അവര്ക്ക് ലഭിക്കുന്നു എന്നുറപ്പാക്കാന് ക്രമസമാധാന ചുമതലയുള്ള പോലിസിന് കഴിയണം- വിഎസ് പറഞ്ഞു.